Incore à l'Bussière (1)
par loumarcel le, 14/03/2007Cha ch'est inne réponse à Bébert
Bonjour Bébert
Min Biau frère Henri que t’as connu i est passé ichi i a deux s’minnes et j’i ai fait lire et j’i ai minme imprimé tout l’prosse que t’as mis su l’site.
Bon à ch’t’heure qui est rintré i s’ramintuve (s’rappelle) des souv’nirs du côté d’Pépère Courtin. I m’a téléphoné pour m’dire c’qui suit.
1 - intre l’ferme Dourlens et l’boulangerie, i avot inne aut’ ferme, ch’étot l’ferme d’Paul Cauvet, i avot minme Mémère Courtin qui allot y traire chés vaques.
2 – in c’qui concerne chés baraquements avec du papier goudronné, i s’in rappelle, i avot minme l’fossoyeur du cim’tière ed Labuissière qui y restot, in face i avot Marie Galopin qui restot là aussi, ale avot deux garchons ed 12-13 ans (i pinse que ch’étot des jumeaux) et y in a un qui étot décédé d’inne méningite.
3 – Derrière l’mairie, intre l’mairie et l’salle des fêtes in montant i avot aussi inne aut’ bouch’rie qui faisot coin. Ed là in allant vers l’campanne (alors là je n’sais pas tout à fait dins quelle direction, mais ch’est pas vers Haillicourt) i avot l’famile Titran qui restot par là avec l'file Marie et sin frère qui livrot du carbon avec in mulet, plus loin i avot inne aut’ ferme.
I avot l’ferme ed Jean Duriez in haut de ch’erriez et l’long de l’ferme i avot inne voyette qui donnot su l’rue d’la montée, dû qu’in haut i avot in bistrot qui vindot du rhum à l’pinte (i s’in rappelle i allot in akater, par pour li bin sur).
Derrière l’ferme i avot Monsieur Mayeux (Mailleux), je n’sais pas l’orthographe qui restot là, i étot pas grand, ch’étot in délégué syndical vachemint connu à Bruay (mi je l’connaicho d'vue) avec ses infants Albert et Odile. Ch’t’homme là i est p’tète cor vivant avec pu d’90 ans.
Minloute t’as dû attinte parler de ch’t’homme là, tout l’monte connaichot M. Mayeux à Bruay.
Voilà, Bébert té dis que personne n’te répond mais faut attinte qu’in s’vot dins l'famile pour avoir chés renseign’mints et i a que mi qui est informatisé et mes sources sont toudis à Bruay ou pas loin et j’armonte pu souvint d’pi que m'belle mère Hélène est décédée.