l'galibot
par nounours-94 le, 20/03/2007Ravettiez-lé passer, l'gamin,
L'galibot presque incore mioche;
Jugez si, dins l'monn' parisien,
in trou'vrot pu futé gavroche
I début' dins l'métier d'mineur
Et port' déjà l'légère tenue.
S'béguin li donne un air gouilleur,
Posé crân'mint sus tiête chév'lue.
il est toudis à pieds-décaux,
El'piau d'ses pieds est tout' cassée,
Com'quéq'un qui travaill' dins l'iau,
Es maronne est souvint r'troussée
Al'fosse, il est avec les vieux.
I port' les bos dins les gal'ries.
Ch'est laid' racommodeux
Qu'i tracasse avec ses moqu'ries.
dins les tiots tros, faut l'vire trottant
In'y-a pas d'danger qu'il estrique.
I disparaît comme un fouan
quand un vieux li promet del trique.
Il est l'terreur des tiot's souris:
In tout temps i leu donne la chasse.
Ed peur, les pauv's biêtes jett'nt des cris
Quand all's ont l'diale ed' sus leu trace
poème de Paul Sébille.
(texte intégral)