Agonie
par nounours-94 le, 20/03/2007Comme t'as caud, min pauf'vieux, té n'sais pu respirer.
Su tin front tout in nache, l'iau al coule tout duchemint;
t'as pu l'forche ed'parler, t'as pu l'forche ed'bouger,
té caches un tiot peu d'air, té caches à viv' enfin.
Ch'est vrai dins chés maisons, personne i peut durer;
El caleur au dehors, al dessèque biètes, et gins.
In pale d'el canicule, in pale même ed' couper
L'iau dins chés robinets qui sert à nos gardins.
In s'inquiète du maïs, des bett'rafes, du pichon,
tous les gins i maronnent, in prie chacun pour sin saint.
El télé, el radio, i cantent el même canchon,
Et ti t'es là tout seul, et ti, in n'tintind point.
T'es là tout rinfreumé, inséré dins t'prijon.
Et pourtant, ti té l'sais t'a été à l'honneur
Quind i fallot des bras pour saquer du carbon.
Quind t'étos pou l'pays, el valeureux mineur.
Pou ti gagner quate sous, pou grossir el quinzaine,
Té saquos comme un diape et té brados t' jeunesse,
Parfos té coupos l'iau, l'iau qu'al arrose l' veine,
Fallot faire du rind'mint pou passer al'caisse.
Mais traiteusemint l'carbon i collot à tes poumons,
T'étos jone, plein d'santé, et in profitot d'ti,
In n'in profitot d'trop, s'qu'à t'armonter du fond,
Pou t'artrouver une plache au grind air, comme in dit.
Pis un tiot peu al fos, t'as resté dins l'coron,
Te v'nos su l' seuil ed'porte raviser les copains,
Raviser l's'ouverriers décaper les maisons,
In pinsant: si seul'mint in m'in f'rot tout autint.
Comme les jours i sont longs et pire les nuits incore,
Quind l'caleur ou l'brouillard i t'étouffent tout duchemint,
Quind té n'peux pus t'couquer et quind tout l'monte i dort,
Même parfos qu'té voudros, qu'l'horloche s'arrête enfin.
Mi té sais j'peux rien faire, mais souvint ej' pinse à ti,
J'pinse qu'un jour té pourras, respirer un bon cop.
J'sais point dusse qué té s'ras, mais j'srais heureux pou ti,
Passe que j'sais qu'del misère, min vieux té n'd'as eu d'trop
poème de Paul Sébille.