min pépère Pouchain (1)

Min pépère: Alphonse Pouchain , i étot né in 1895 à Bruay les Bardoules; i avot comminché à déchindre al' fosse à l'âche ed 12 ans , chétot comme cha , à c'temps la! et pi , i étot v'nu s'installer à Grenay in 1931 et i avot travaillé al'fosse 5 jusqu'à s'retraite in 1946
i est mort in 1966 , silicosé à 100%...

Tout cha , pou vous l'situer ..

Mais pour mi , min pépère, chétot quequn d'bien , un homme pas ordinaire ! j'me souviens d'li comme d'in saint ... si m'vot d'là haut , i dot sourire vu qu'i étot un communiste inragé !

Quind j'pinse à li , j'vos eune figure toudis souriante et ridée avec des grindes mirettes d'un bleu transparent qui appartenotent qu'à li; i avot pu d'dints et cha li donnot l'air bon infant , i m'faisot pinser à Mathurin Popeye... i respirot l'bonté et in l'avot querre , em' tiote soeur et mi.

I avot habité al cité Belgique , du coté d'chez Planque avec eume mémère et m' mère. Et pis , in l'avot plus tard déménagé sins li demandé s'n'avis dins "l'cité des Pinsionnés", 3 rue del Guinée , au pied d'ech terril du 11
qui ch'est qui connot ?
Y avot des tiotes masons accolées par bande de 3: 2 pièces chaque : el pièce ed' devant qui donnot sur un tiot gardin et eun' baraque à carbon
et l'pièce ed' derrière qu'étot un'chambre ; al avot aussi eune porte qui donnot sur un gardin et les cabinets : eune planque posée surl'fosse
ch'étot très pratique , quant i fallot y aller l'hiver , quint in est silicosé! heureusemint , dins ch'timps là tout l'monde i avot un siau hygiénique !

Tout cha , ch'est pour vous situer les lieux , y a p'têt des gins qui s'rappelllent!

J'arrête là pour aujourd'hui et si y a des gins qui s'intéressent à mes souv'nirs d'infance et à min pépère, j'vas continuer ... in aut' jour !

ben Monique, mi forchèmint que cha m'intéresse, j'vas suremint apprinde des chosses que j'a pas pas connu à Grenay

j'vas rapp'ler qu' Monique et mi in a découvert qu'in avot été voisines, Monique ale habitot l'coron derrière l'mien, mais comme in a queques années, oh pas gramint, mais quand in est jone cha plus d'différince, donc disons qu'in n'a pas jué insanne mais qu'in a pas mal d'connaissances communes