ch'est pas d'em faute !

J'disos à Marie-Claire que quind j'mettos m'nez dins ch'l'ordinateur , m'n'homme y étot abonné à ches pâtes , tellemint qu' j'voyos pas passer ches heures ....

Cha m'a fait pinser à eune histoire vraie qu'em mémère Cadet al racontot .

Dins l'cité Maroc, dins l'dernier coron, ch'ti d'vant "chez Mathilde" y'avot eun' femme ed mineur qu'étot eun' vraie camanette : al faisot toutes chés masons pou boire eun' goutte ed jus , pou cancanner, al allot d'l'eun' à l'aute et ch'timps i passot sins qu'al l'euche vu !

Mais s'n'homme i devot rintrer del fosse et sin minger i étot pas fait ... alors, em' camanette , al avot d'z'idées : al ouvrot sin poulailler et pis al mettot ches glaines al' cour ....
quand ch'n'homme i arrivot, el li disot : " t'a vu , al se sont cor sauvées , j'cache aprés d'puis eun'paire d'heures ... et j'minger i est pon prêt, ch'est pon dem' faute ! ".....

alors là , y avot deux variantes : ou bien i cachotent insimbe aprés chés glaines et ch'pauv homme i mingeot des tartines trimpées dins du café, ou l'rest' ed sin briquet ....
ou ben , i cachot tout seul, et m'commère al i faisot cuire vite fait des nouilles !

Cha n'arrivot pon toudis , i se sr'ot douté d'queque cosse... mais cha arrivot souvint ... et cha faisot sourire chés voisines qui avotent compris l'ruse

sauf qu'un coup (p'têt qui n'navot marre ed minger des tartines trimpées dins du café aprés avoir trimé au fond) ech'n' homme i a mis eune double rangée d'grillache autour d'sin poulailler pour pas qu'ches glaines al s'sauvent cor ...

Mais i arrivot de timps in timps qu'eun' sale biete al s' sauvot pindint qu'el camanette al i donnot à minger.... juste au momint del remontée del fosse ! alors i fallot bien cacher après : pinsez ! chés pauv' voisins : al z'y aurot mingé leu salats !

Mi , j'ai pon d'glaines... alors em' n'homme .... i minge des nouilles !

ben Monique, mi aussi j'a ker les nouilles .... mais ales sont pas souvint "al dente" ... cha m'arrife d'les oublier un tiot peu, ch'est drole comme cha passe vite el temps quand in est d'vant sin pc ...
et quand j'in fait pas pindant eune semaine, l'jour que j'in r'fait j'intinds dire, "ah ben quand même, y avot longtemps qu'in n'avot pas mingé d'pâtes" .....