min pépère Pouchain (4) el sintimint d'ches murelles
par dubois monique le, 25/04/2007A côté del mason d'min pépère al "cité d'ches pinsionnés" à Grenay, y avot des gardins pou ches viux mineurs. Ch'ti d'min grind-père i étot vraimint biau et faut vir comme i n'étot fier! ch'étot l'plus biau d'elz alintour...
Pinsez à eun' belle voyette ben sarclée, sins l'pu tiot picholit, sins herpe, avec eun' bordure ed fleurs ed d'arbusses mélingés : vous trouvotent côte à côte des groseillers rouches, des blancs, des "croque-poux" (j'avos pas ker),des haïures d'rosiers inciens, des tulipes, et surtout des massifs ed murelles (giroflées) qui parfumotent l'air : y in'avot ed'tout' ches couleurs : des jaunes, des rouches clairs, des plus foncées, des mélingées.
Quind j'ferme mes yux , ch'est l'sintimint d'ches murelles qui m'arvient !
Min pépère, i aimot pas qu'in cueille chés fleurs : i disot qui fallot les laicher là, dins l'tierre, qu'i préférot aller les nifler dins sin gardin , plutôt qu'd'ins un vase... et i étot toudis à joujouque in face d'un rosier, d'un pied ed'murelles, i fermot ches grinds yux bleus et i soupirot d'aisse; et i avot raison : ch'étot cha , l'paradis.
Quequ'fos, i nous donnot queques fleurs mais i attendot qu'al sochent à mitan fanées... mais nous, comme in savot qu'i voulot pas "déringer" sin biau gardin, in les prenot et in disot rien!
Y'avot aussi des légumes, par derrière ches fleurs, mais ches porions, ches salats et ches patates, al m'intéressotent point : mi, j'aimos ches murelles !
Min pépère, i parlot à ches fleurs, à ches z'oziaux, à ches tiotes coccinelles et i nous arcommindot d'pas prinde ches "bietes à Bon Dieu" pacequ'elles allotent mourir si in leu privot d'leu mason ! in les ravisot avec li, in comptot ches points et pi, in les reposot su eun' rose ou eun' murelle.
J'pinse toudis qu'min pépère , ch'étot un vrai poète !
J'ai mis des murelles dins min gardin ... mais chelles d'astheure , al sintent pu pareil !