Berck plache et ches nudistes (1)
par dubois monique le, 02/05/2007Et, ben Minloute , in devot y est' à l'mêm année ! mi , ch'étot in 1976 , qu'in m' prom'nint intre Merlimont et Berck, aveuc em' tiot famille (i z'étotent 3), j'ai vu ed' loin, un group ed d'gins qui étotent tartous argroupés... i avot qu'euche, pas ein chien à leu côté ....
ach' t'époque là , j'portos pas incor ed' lunettes mais cha simblot bizarre ed vir chés gins là tout seu !
Et pis, in n'a vu un s'détaquer d'ech tas, su in vélo ... pus i s'rapprochot, pu in d'vinot, qu'i étot tout nu !
chés gosses aussi i l'avotent vu ! i restotent bouche bée : imaginez ch'tabliau !.. "t'as vu man, ch'l'homme i a pas d'calçon ... cha dot faire du mau à chin zizi ..."
et i ravisotent, et i montrotent du doigt et mi, j'savos pu dù qu'ch'est m'mettre !
Ch'l'homme , i est passé à nou coté et fort poliment, avec sin zizi qui rebiquot, i m'a dit : "bonjour , madame" , j'sais pas c'que j'i ai répondu ... ch'étot l'premier' fos que j'voyos un nudisse et j'savos pon qu'i inn'avot dins l'coin !..
Y a fallu s'rinde à l'évidinche : ches aut' gins, ch'étotent aussi des nudisses ... qu'est ce que j'devos faire aveuc mes tiots : avincher ou arpartir vers Merlimont?
j'me sus dit qu'el plage al étot à tout l'mond', qu'chés nudisses i z'allotent pas nou minger et qu'j'allos continuer min quémin ...
J'ai donc fait l'moral' à ches deux pu grinds : "in passe, vos ravisez pon, vou fermez vos bouques et vou avinchez vite ! mais pon à toute berzingue, faut passer inaperçus " ! mine ed rien, j'leu ai fait faire un tiot crochet pou dévier d'em trajectoire et in a avinché pas trop duch'mint.
Arrivés à leu côté, min gamin i s'est mis à trainasser et à raviser ch'group', j'étos obligée d'el saquer d'eun' main, et d'tirer l'poussette ed' l'aut', j'in pouvos pu : " habile "..... eun' femme, al m'a souri , al m'a dit qu'j'avos d'biaux infants, eun' aut, al s'est l'vée pou s'approcher d'mi, al leur a donné un bonbon et mi, j'savos pas d'où qu'eu j' devos mette mes yux : ch'est mi qu'i étos gênée et pas eusse et mes tiots iz'avotent leu nez au niveau d'ches zizis et aut' nénettes .. et i n'in perdotent pas eun' miette ! mais i z'ont pas ouvert leu bouques! sauf pou minger ches chucs !
Y'a même un homme qui m'a dessaqué l'poussette d'min tiot dernier, qu'jarrivos pon à sortir du sape.
In a continué nou quémin, et in a fait not pique-nique comme ch'étot prévu.
Ches deux grinds i parlotent que d'cha et i m'posotent des questions su l'sape qui devot faire du mau, su l'frod qui faisot .... j'in passe et des meilleux !
In arvenant i z'étotent pu là .... mes tiots i l'ont argretté ! pas mi !
Aprés , cha ch'est su qu'i avot des nudisses et i avot gramint d'gins qui allotent à Berck par el plage ... allez savoir el raison !
Mi aussi j'y suis artournée, j'avos querre ch't'promenate, et ch'l'effet d'surprise i étot passé, quind j'voyos ch'group, j'y faisos pu gaffe et les tiots non pu , i z 'attindotent leu chucs !
NB de Marie-Claire : lien vers le sujet de minloute :
Berck plache et ches nudistes