à Grenay: al'z'étotent occupées ches femmes!
par dubois monique le, 10/05/2007Ches Soeurs del'cité 5 , al'z' avotent ouvert des salles pa-d'zeur leu communauté : chés femmes ed'z alintours, al venotent apprinde à faire del couture
dins ches années 1957-1958, al'z'étotent parfos eune trentaine à v'nir coud, dirigées par Soeur Marie-Joseph ; ch'étot l'bonne soeur qui étot là pou leu apprinde à coper, et fabriquer des vêtemints.
Al'z'apportotent leu pièches ed' tissus, Soeur Marie-Joseph faisot ches patrons, taillot et ches apprinties, al cousotent.
Em' maman al avot el' coeur a l'ouvrache' et al a produit gramint d'piéches pou ches filles : robes in Vichy, écossaises, des shorts, des jupes charleston, et même un biau blazer bleu-marine qui a duré longtimps ! in étot à la page !
I avot des femmes qui v'notent ed Grenay (cité Maroc, cité 11) comme Jeannette Robbe, Mme Damiens, Antoinette Debusse, Gaby Dehon, Mme Lemaire .. et d'autes ! i n'n'a qui v'notent ed'pu lon : des Alouettes, ed' Bully aveuc leu vélos.. ch'est vous dire qu'chétot réputé, ch't'ouvroir !
Chés femmes, al' travaillotent gramint et al' riotent gramint auchi! La Jeannette, ch'étot eune marrante qui leu racontot d'z'histoires drôles.... pas toudis bonnes à intinde par eune bonne soeur ! mais ch'l'ambianche al étot tellemint décontractée qu'cha passot et qui n'a qui in redemandottent !
Y'avot pas qu'del couture, y avot auchi del' cuisine avec Melle MARIA FLAMAND : chétot el même jus : fallot ramener ches ingrédients et al faijottent des gatiaux, des salates variées, des intrées originales; al'z'apprenotent l'hygiène, el' rinçache del' vaisselle par exemple
là, leu nombe i étot limité à causse d'chés fours: i n 'n' aurot pas eu assez pou cuire 30 gatiaux roulés ! in peut in parler d'ches gâtiaux .... aprés avoir appris l'recette, em ' maman al arcomminchot plusieurs fos ed' suite ... et ches autes femmes aussi ; dins chés corons, in a eu des périodes ed' moka, ed' savarin, d'tarte aveuc des fruits d'saison
in s'in plaignot pas, vu qu'chétot du nanan, mais j'em rappelle qu'i a eu un momint duqu'ch'est qu'in n'avot marre ed minger toudis l'même gâtiau! in s'disot qui étot timps qu'mamzelle Maria al passe à aut' causse!
Et pis, ch'est pas tout, mes gins ! parfos, ches dames, al'z allotent raviser eun film dins l'communauté : al's ont ravisé el' série d'chés SISSI, assises sur des caïelles qu'al plachotent in face d'un écran blanc
Em' maman, al dit cor achteur in in parlant aveuc eune vo émue: "qu'chétot biau ! Romy Schneider, chés costumes".
Dins chés années là, chi t'étos mal arnéqué et chi t'est mingeos banal, ch'étot pon l'faute d'ches bonnes soeurs !
M'maman, al a discuté ed' tout cha hier avec ses copines du club du troisième ache (i n'n'a dont j'ai donné l'nom ichi), del salle Caullet, et pis , j'lai "interviewée" pour qu'ech puiche raconter dins l'site... chés aînées al'z'étotent contintes dé s'rappeler d'tout cha et leu langue al a bin marché intre deux parties ed'rami.
Quind ch' l'article i paraitra , ch'va l'imprimer pou leu invoyer ... chés auteurs, ches eusse, pas mi !
Ben du coup mi j'profite que Monique ale va imprimer pour faire lire, pour faire un tiot coucou à tertoutes et ptete tertous qui vont arviffe leus souvenirs et qu'in in profite avec plaiji su ch'site et qu'in plus faut bien l'dire Monique ale raconte tout cha très bien
j' vous armercie gramin, del part d'eune ancienne grenaysienne del rue Debussy, cité Maroc