min Pépère Pouchain (8) et ch'canarien!
par dubois monique le, 22/05/2007Eune année, in avot acaté eun biau canarien qui cantot toudis: ch'étot eun plaiji d'l'acouter : i faisot l'bonheur del' famile . Quind min pépère i v'not à nou mason , i s'plantot ed d'vant l' gaïolle et i bougeot pu d'un poil, tellemint ch'canarien i l'i plaijot ! faut dire qu'i n'n'avot jamais eu ........
Quind in est parti camper , in s'a pas posé d'question : nou pépére Pouchain i's'ferot pas violence pou s'occuper d'ech moniau.... in l'a apporté aveuc es' gaïolle bien récurée , aveuc ches graines, ch'l'oche ed' seiche ... et in est partis tout contints.
A nou retour , in est passés tout drot al Cité d'chés Pinsionnés pou vire pépére Pouchain et arquerre nou canarien.
A peine qu'in étot dins l'mason , qu'i nous a pas écoté parler d'nou vacanches : in avot invoyé des cartes postales, ch'a l'i avot suffit ... et y avot pu ren à dire : i parlot que de ch' canarien: in' n'avot qu'pou li !i l'appelot " min tiot"...
I avot armarqué que ch'l'oziau i aimot ch'l'accordéon ... alors , l'matin i allumot es' T.S.F à toute berzingue pou que "min tiot" i puiche canter à s' n'aisse: ch'a tombot bien qu'sin voisin i seuche sourd !
I z'avotent tous deux eune préférence pou André Verchuren... et "min tiot" i l'arconnaissot ! Yvette Horner , ch'étot pas parel !
Et pis , i avot bien ravisé chés habitutes et i avot fait d'z'essais: i nous a appris qu'el canarien i aimot picorer dins eune patate cuite , qu'i avot quer ches tiotes nouilles et qu'i mingeot auchi des tiots morchiaux d'jambon ! i nous a dit qu'in l'nourrissot mal si in n'li donnot que del' salate !
I avot installé eune boite ed' pastilles Valda pleine d'iau ed'dins l'gaïolle pou qui s'baigne... et i nou racontot commint i lissot ches pleumes ..... commint sin "tiot" i l'arconnaissot, commint , li , min pépère, i savot vire qu'ech' l'osiau i étot flappi d'avoir canté et qui étot timps ed'pu juer aveuc. In n'arrivot pas à l'arrêter d' parler : i n' n'avot qu'pou ch'l'osiau! i avot du in passer du temps aveuc ech' canarien ! fallot vire comme ses grinds yux bleus i brillotent !
Alors , in s'a tous ravisés et in a pon eu b'soin d'parler ; in s'avot compris .......
In y a laissé chés cadeaux qu'i avot même pon ravisés et ..... ch'canarien !