El z'élections des députés
par TIOT RITAL le, 05/06/2007El z’élections des députès
A ch’votache i'a tros étapes : 1 El préparation 2 El votache 3 Les résultats !
In preume os’ archévez eine masse ed prospectus ! " Tertouss insanne aveuc Dupont ! " Tertouss insanne aveuc Durand !" " Tertouss insanne aveuc Dupuis !" Au départ in est tertouss insanne mais à l'arrivée i n'd'a fauque un qui touche les doupes !
Acoutez ch'ti chi ! :"Les jonnes au traval ! Les viux à l'mitralle ! Votez Coptalle, interpréneu ed funéralles ! " Et ch'ti lal : "Ed l'ouvrache pou tertouss ! " Mais i s’a servi in preume ! I'est fauque Mayeur, député, conseiller régional, présidint d'intercommunauté ! I'est pou l'cumul des mandats .....poste ! I'est méd'cin ? I dot sogner ses gins pa correspondance !
Cor un : Votez Painsec ! Bé i n'pass'ra mie ! Ah ch'est s'nom ! Quo qui dit ç'jonne male d'agache ? " Dévlo'pons el marine à voiles à Volinciennes ! l I'a fauqu'à mette du sape su les rifes ed l'étang d'Trith et du sé (sel) din l'iau ! Comme cha in él'v'ra des mourmoulettes (moules) ! " Cha ch'est un programme qui met… l’iau à l'bouque !
In n'va mie voter à l'berli berloque (n’importe comment) ! In met chés papiés su l’tape . A ch’momint là , pa l’huche (porte) grand overte el vint qui souffèle l’zé rue (jette ) à tierre chés papiés pa tierre ! Gisèle, em’ feimme, qui nettiot el carrelache rue un séyau d'iau savonneuse qui espite (éclabousse) partout !
- Giséle, ravise chu qu't'as fait ! El photo du papié alle déforméé, in dirot Frankeistein !
- T'es berlou ! qu'alle répond. El papié i'est point cru ! Ch'est l' vraie photo del mairesse ed .....
- P'têt' ! Mais ravise ch’papié là i'est bin accrui ( humide) et i'a pu rin d'marqué !
- Ch'est pasqué j'ai pris del pourette (poudre) Momo ! Momo décrape(décrasse) à fond el crape (crasse)! Si i'a pu rin d'écrit ch'est pasqué ch'tot des mintiries !
Pis arrife el votache !
Comme in est des primaires in va voter din d'z'écoles primaires ! In d’mande au planton el mote d'imploi. I vous ravise dé s'n'oeul noir. El veile, in collant d'z'affiches, i'a rincontré un concurrint qui li a achochoné (caressé) sin ramon à colle in plein n'oeul ! Bon, os’rintrez din ein tiot théâte d'riére el ridiau . Faut s'décider ! Comme in n'peut point punaiser les bull'tins su l'paroi in fier, in l'zé met pa tierre. Pou coeusir (choisir), in fait comme les z'infants " Trou, pic, nic , doulle ! Ch'est ti l'andoulle ! « Cha té peux l'dire ! Et un bull'tin d'éliminé ! Faut s'abassier pou l'arsaquer et in s'arliéfe pou arcommincher el manoeufe ! Et i'a toudis un gamin qui ravise pa d'zou l'ridiau et qui os’ imite ! In s'abasse, i s'abasse ! In s'arliéfe, i s'arliéfe ! Si ch'est l'gamin du chef ed musique i bat l'mésure in cantant : " Arliéfe teu, abasse teu ! Saque el bull'tin, qui va nin, Zéphirin ! "
Trosiéme étape : Stupéfaction des résultats !
In décafote les bull'tins pou compter les vos. "L'addition, l'addition ! " cri'té les candiadats. Queulles seurprises! Copetalle 0,001 % des vos pa carité ! Richard 0,002 %, Painsec : 0 % ! Ouais ses bull'tins étott'té eine milette crus édonc ch'tot un sine d'arconnaissance ! Forchémint, i nou avos mis l'iau à l'bouque aveuc ses mourmoulettes ! Dupont 45 %, Durand 40%, Dupuis 35% ! Mais cha fait pusse ed 100 % ! Ouais, mais ch'est comme au fotbal, les vos à l'extérieu dé l’cité, i compt'té doupe ! Ballotache ! Pou l'déziéme tour in ara el ballot d'droite cont' el ballot d'gauche !
Les candidats i armerci'té leu électeus. Coup'talle i s'armercie li même pusqu'i n'a eu qu'eine vo, Richard qui n'd'a eu 2, i fait eine baisse su l'tiéte dé s'biau frére ! Pis arrife el 2iéme tour : in arcomminche : Bonjour au planton qui a, ch'cop chi, 2 yux noirs pasqué el veille l'aut' oeul i’a archu l'visite d'un aut' ramon concurrint . Aprés pic! nic ! doulle! etc ! Gaston i étot in frousse ! (en rage). El dimanche, i'avot voté pou l'candidat d'l'opposition. Ch'ti chi avot été élu et aussitôt, el lundi, i'a artourné s'capote pusqu'i disot êt' bénache d'êt' din l'majorité !
Tiens, v'là chi un prospectus qu'in a oblié ! Mais nan ch’est eine facture ! Alle porte un nom d'ichi, Tiot Rital ! Eh bin mes gins, el prochain cop, tertouss insanne, ej vous ai compris, sin barguégner (hésitez), votez pour Tiot Rital !
Tiot Rital