Les jardinstraitement de faveur à la maison
par branque'ed'thym le, 20/08/2007Le chti, in avot pas l’drot del parler a’l maison : min père i voulot pas, in avot vraimint pas intérêt à oublier cha, sous peine ed vire arriver chés z’arprésales vite et bien..
Comme dins grindmint d’maisons, fallot mieux filer droit ! nous chés jones, in étot point malheureux, non ! mais fallot obéir et in savot obéir sans discuter : in’s' rind toudis compte après qu’i avot du bon dins not’ éducation…
Dins l’famile ch’français i étot donc ed’rigueur, décrété comme « Arrêté Préfectoral » mais là chétot « Autorité Paternelle », cha r’vénot au même, mais i’avot eune seule exception, pas deux, et ch’étot pour chés grinds parints, i n’connaichotent que ch’patois. Point.
D’ailleurs ch'est pas compliqué, si i cachotent à faire ed’zefforts pour parler ch’français, chétot abominape, parce que là pou’l’coup in n’comprenot pu rien ! i’a donc fallu accorder comme eune « dérogation », eune intorse à ch’règlemint intérieur qui nous plaijot bien mes frères et mi, et du coup, in a eu drot à ch’statut d’bilingue bien avant d'quemincher à étudier ch’l’inglais au collège.
Et cha nous a pas impêché d’être ed’bons éleffes. Ch'est pas biau cha mé gins ?
