un combat d’ co’s
par kiki le, 14/12/2007Un combat d’ co’s de Constant Copin
( Equettes – Juin 1951 )
L’autr’ jour v’nant d’ toucher min pécule
V’la que j’vos sur un calicot,
Ecrit in gross’s lett’s majuscules
« Un sinsationnel combat d’ co’s »
Quind j’ intros dins cheulj’ tiot’ arène,
Cigarett’s et pips’, cha funquot ;
Je n’savos pus r’printe m’n haleine
Et je n’veios point ch’ combat d’ co’s.
Dins ch’nuache d’ pleum’s et d’ poussière
Chés ail’s et chés patt’s cha claquot,
Et dins ch’brouillard cheull’ cabartière
All’ versot pindant ch’ combat d’co’s.
In vot risquer des billets d’ banque
Pir’ qu’all’ roulette d’ monaco
Pindant que l’ sang rougit les planques
De ch’ parc qui intour’ ech’ combat d’co’s.
Dins chés coqu’leux y-in a des riches
Et d’aut’s pour payer leu’ écot
L’vindrot’ent leu’ derniér’ quéumiche
Histoire d’vir un combat d’co’s.
D’sur min banc, j’suos, à grosses gouttes,
A cops d’queute in m’estomaquot
Ch’étot mi qui r’chevot les joutes
Ed chés coqu’leux, dins ch’combat d’co’s.
Infin, cheull’ partie a’ s’ termine,
Chacun un tro’ dins leu poitrine ;
Chés combattants meurt’nt exéquos
Comm’ ch’est bizare, un combat d’co’s.
Mais ch’est bintôt l’ combat vedette,
Ch’ l’armeux i’ prépar’ chés piquots,
J’avalos bin vite m’canette
Pour r’weittier ch’ pus grind combat d’co’s.
Un grind co’ noir à l’air bravache
Introt dins ch’parc tout d’un seul cop.
I-avot déjà fait des ravaches
Dins eun’ douzaine d’ combats d’co’s.
Cha ch’étot eun’ biête épatante,
Aussi sur elle chacun s’risquot
Mais eun’ aut biet’ rouge, éclatante
Faijot s’n’ intrée pou’ combat d’ co’s.
Plus tiot qu’ laut’, mais queull’ assurance,
Alors mi, sins savoir pourquo
Ch’ vife argint i-avot m’ préférence,
J’ parios pour li dins ch’ combat d’ co’s.
Chés deux sujets n’mainquot’nt point d’charme,
Leus crêt’s rouch’s comm’ des coqu’licots
I’s s’ mesurot’nt comm’ deux maît’s d’armes
Avant d’ commincher ch’ combat d’co’s.
Veiant ch’noir passer à l’attaque
J’ sintos min nez qui s’rassaquot
J’ maros bin sauvé de l’barraque,
J’n’osos pus r’weittier ch’ combat d’ co’s.
Mais ch’rouch’ par eun’ parat’ rapite
R’venot sur li et l’estoquot.
Ch’ grind co’ noir i’ mourot tout d’suite ;
I’ n’avos rin vu de ch’ combat d’co’s.
Et s’ n’éclatant cocorico,
Mais ch’ vainqueur m’ rapp’lot pas s’prestance
Ch’ co’ Gaulois, ch’ co’, not’ si bell’ France,
Terrassant ch’ l’aigl’ dans ch’ combat d’co’s.