L’aïeul et sin tiot fieu
par kiki le, 02/01/2008L’aïeul et sin tiot fieu
Un grind-père, un biau jour, s’prom’not t’nint par la main
Sin tiot fieu, un infint, qui avot peine à marcher ;
Y z’allotent, tout douch’mint, in prenint tout leu timps,
Ch’tot l’printemps, et j’cros bin qu’in rintrot dins l’mos d’mai.
Ech gosse y ravisot d’tous ses yeux la nature,
Les fleurs blinques d’aubépine, les bourgeons, l’vert gazon,
Tout autour d’eux ch’n’étot qu’ du solel, del verdure,
Et in intindot foque des osiaux, que l’canchon.
Sus l’bord ed chés fossés, in veyot les reinettes,
Sauter d’tous les côtés, plonger dins l’iau si claire,
Qu’al y réfléchissot es’ jolie tiote binette,
Pindint qu’attintiv’mint surveillot sin grind-père.
Dins l’ciel d’un bleu d’azur, trainottent tros quat’ flocons,
Qui d’allotent, tout douch’mint, eusse aussi sins s’presser,
In intindot pus rien, ch’est à peine si au long,
Résonnot d’timps in temps l’chant d’un coq fatigué.
Pou arposer ch’l’infint, el vieux y s’ajouquot,
Alleumint s’pipe ed terre pindint que l’tiot garchon
Chuchot un bout d’réglisse et bintôt s’indormot,
Calé cont’ sin grind-père, y poussot un ronron.
Sus les fosses, les molettes, in haut d’leu chevalet,
Tournottent, s’arrêtottent, et r’partottent joyeus’mint,
Pou armonter l’carbon que l’mineur y avot fait,
L’artraité y busiot, li, qui avot fait sin timps.
Ses yeux à d’mi fremés arpassottent des souv’nirs
Ed tout ses camarates, parfos y souriot,
Peut-êt’ ed sin jonne timps et des parties d’plaisir
Qui l’avottent marqué quind y étot galibot.
Quind l’tiot y s’réveillot, y r’prenottent el quémin,
El pipe al tot finie, ech’ bout d’réglisse aussi,
Y pressottent leu pas, car ech’ tiot y avot faim,
Sachint qu’au bout del route, cheule tabl’ s’rot sur’mint mis.
Quind l’soir après minger in l’mettot dins sin lit,
Ech’ gosse n’y fallot point d’calmants pou l’indormir,
Qui tonne o bin qui vinte, y n’faijot pas un pli,
Y dormot comme un anche, ch’étot plaisi del vire.
Chou qué j’viens d’raconter, y a longtimps qu’ch’est passé,
Y a presque soixante ans, et ch’étot un jeudi,
Ed’ puis l’grind-père y est mort, les innées y ont passé,
J’sus dév’nu vieux aussi, mais l’tiot garchon… ch’tot mi.
Paul Sébille.