i sont formidapes chés ch'tis !

Ech' su armontée dins l'Pas d' Calais pou les 100 ans d'em' marraine Jeanne... et in peut dire que j'em sus pon innuyée et pis in plus, i pleuvot nin, ch'est tout dire !
Ech' sus artournée à Grenay, min fief et pis su l'côte vire si y avot cor des moules à Equihen... mais cha, ch'est l'habitute quind j'rintre à m' mason, j'vas toudis in pélerinache.
Mais y a un truc qu'j'avos jamais fait : assiter à un dîner dansant, et ben ch'est fait !

A Hersin-Coupigny y a eune tiote association qui s'nomme "el bien-être des infants" al' est présidée par eune femme, Patricia, et al marche aveuc eune quinzaine d'autes femmes bénévoles
et chés femmes là, al font des miracles pou chés tiots infants d'chés invirons : al z'aident chés mamans in détresse, al donnent ed quoi minger, s'habiller, al montent des dossiers ... et j'in passe, et pis cha fonctionne bien : malheureusemint del misère, i'n n'a pas qu'ailleurs dins l'monde, i n' n'a auchi à nou porte !!
Alors pou avoir des sous, in plus d'chés aides habituelles d'el commune et aider ch'zautes, al'z'ont fait ch'repas dins l'salle d'ches fêtes d' Hersin !

Extra ! y avot 150 personnes et eune vingtaine ed' tiots infants, del musique, eune imbiance qu'j'avos nin vue ailleurs !
Et pis, in l'dira jamais assez : i sont formidapes ches ch'tis ! i a qu'eusse pou faire des trucs comme cha ! non seul'mint, comme al dit em' maman : "in a fait eune chair ed' roi !" in plus, y avot eune tiote tombola, tous chés gins i sont arpartis aveuc un tiot lot ! et fallot vire comme i z'étotent contints d'aller querre leu bricoles (mi auchi), y avot foule et ches bénévoles al'z'étotent dépassées... et pis ch'est pon tout, y avot eune grande grille aveuc 200 cases pou gagner 3 gros lots : j'auros ben aimé rimporter ch'vélo .. mais j'l'ai laiché à eune aute paceque dins ch'train cha aurot posé des problémes! el femme qui a eu ch'vélo, al brayot d'émotion et j'étos près d'braire mi auchi, rien qu'à l'vire et tous chés autes qui étotent contint pou elle
Nan j'vous l'dis, i a qu'dins l'Pas d' Calais qu'in treuve des imbiances et des gins comme cha !

Et pis, j'peux pas vous quitter sins vous parler des canchons, del musique : des airs polonais à donner des gambes à un cul de jattes, des tas de danses qu'in connot pas ichi dins mes montagnes : El Rouki Zouki, j'a ben aimé ! j'avos artreuvé mes 20 ans, em' maman auchi, et in plus, i z'étotent tous aimapes aveuc mi, j'avos l'sintimint qui m'avotent toudis connue, j'em sintos in famile et j'sus d' Grenay, pas d'Hersin !
I sont formidapes chés chti! chés bénévoles, chés commerçants qui ont donné des lots, chés gins qui sont tous v'nus al fête pour aider ch'l'association, et j'pinse auchi al'munichipalité qui dot s'arquinquer d'avoir des citoyens qui y font honneur, j'n'in connos pas beaucoup qui s'mettent in peine comme cha, pou v'nir in aide à leu intourache dins l'besoin
I sont formidapes chés ch'ti : in l'dira jamais assez.