Vive l'ACHTIMIE !
par TIOT RITAL le, 18/02/2008J'ai point cor ravisé "bienvenue chez les Chtis" alors j'dirais arrien su l'film à Dany Boon. J'espère qui sara mette in valeu les gins du Nord et du Pas de Calais. Ouais pasqué sovint in déméprise not' région . Ch'est à croire qu'in resse au Pôle Nord et qu'in est des biètes! V'là un tiot tecste qui dit chu qué j'busie dé l'fausse manière d'vir not' région
VIVE l'ACHTIMIE !
Vous z'avez armarqué quind les médias alles donnte un eczimpe d'eine trisse affaire comme l'alcolisme, l'drogrie ocore aute cosse, chés jornalisses i viennte toudi l'printe din note région et i z'interrochte, mie vous ou mi, mais un gneugneu agimolé (sot mal habillé), qui resse din eine baraque in abic abac (masure en désordre) acrapie (sale) et qui jaspide (postillonne) din ch'micro ! In s'fait bin démanoquer (démolir) !
Tnez à Paris-Roubaix, les télés rambuqute (font du bruit sur)d'l'infier du Nord mais vrémint macaveules (aveugles), alles oblite d'vir qu'nos campanes alles sont viertes ! Si in faisot ein Roubaix-Paris, es' qu'in s'attargerot (s'attarderait) su Paris infunqué (enfumé) et s'banlieue racaillée ?
In dit "l'climat i'est frod !". Ah bon ? Au momint duss qu'in délocalisot , l'télé d'Paris moutrot un culs à laine (fonctionnaire) parisien prélat (arrogant) et rafrogné qu'i s'déclamintot (se lamentait) d'monter din l'Nord pasqu'i y fasot pu frod qu'à Paris ! Tiens, tiens ! Adés porquo ch'menheer (fat) i'avot s'nez rémé (givré) et portot greusse capote (manteau), larche écharpe et casquette à z'orelles ?
In dit "El ciel i'est toudi gris !" Et alorss' ? Ch'est miux pou l'santé ! Comme cha in n'attrape mie d'cop d'solel ! Et pis, cha n'impêche point nos cinsiers d'avoèr les méïeures récoltes d'peunnes tierre, d'avoéne, d'porions (poireaux) etc qui s'artreuv'té din ....les gasiaus (gosiers) d'chés mordreux ! (morveux)
In dit : "El pays i'est plat !". Mais héreus'mint ! Cha, ch'est not' souci ed démocracie ! Ainsin, i'a peursonne qui est pu haut qu'ein aut' !
In dit "Vos overriers i sont point qualifiés!". In n'disot point cha quind nos aciérisses, nos carbonniers, acravintés (exténués) d'ouvrache, saquot'té eddin (travaillaient fort)! Ceusses qui diste cha, i n'ont mie busié (pensé) à l'zé préparer pou d'nouviaus métiers ! Et pis, nom dézos, cha n'est pu vrai ! Achteure in a bocop d'étudiants! Ouais mais in dit : "Vos z'étudiants i sont pu faipes !" Allons allons, i'a pon qu'au foot qu'in filoute ! Ravisez duss qu'i'a les trafics ed sujets d'bac ! Vous coperdrez leu meïeure réussite !
L'pire ed tout, ch'est qui n'd'a, chez nou, qui ont honte d'not nom "Nord" et voudrot'té l'canger in "Haut de France !" (faut l'dire aveuc eine bouque in cul d'glaine ôôô deu Fraaance !). Traites, rénégats ! Si in dot canger not' nom, mi j'proposse " La Chtimie" ou cor miux l’ ACHTIMIE , ACHTIMIE in un seul mot ! Ouais diste les bafious, mais si l'Nord i print el liméro 1 (numéro), va falloir canger les liméros des z'aut' départémints ! Mais nan tas d’biecs bos (sots) ! In cangerot mie les liméros ! Pusqu'in dit qu'in est des crétins, in prindrot el liméro 0 et même el doubel 00 !
Cha claqu'rot l'bec à tous chés bafious, sin discussion possipe, in s’rot toudis au prémier rang .......pa orte alfabétique !