L'carrieu d'chenne, Ch Bruchet .
par JF Majcher le, 13/05/2008L’CARRIEU D’CHENNE
Poème de Charles Bruchet, Noeux les Mines (1925-1989)
Extrait du recueil de poésies publié en novembre 1977 à Noeux les Mines
Quand j’ai quitté l’écol’, j’avos à pein’ treiz’ans,
J’étos haut comm’ trois pommes in m’appélot bout d’zan,
Aussi pour m’imbaucher, ch’étot tout’ un’ affaire,
Chaqu’ fos qu’ je m’présentos, i avot pus rien à faire.
Em’ mèr’ qui étot veuv’, min père tué à l’fosse,
Voulot pas vir’ déchint’ au fond, l’plus vieux d’ses gosses.
J’allos rétamper blé au momint d’el moisson,
Quand j’rapportos quat’ sous, j’avos m’ p’tit’ commission,
Mais je m’rindos bien compt’ d’el charge que j’étos,
Et j’avos presque hont’ d’êt’ souvint sins boulot.
En lisant les affich’, passant d’vant la mairie,
J’apprinds qu’in demandot quelqu’un pour el voirie.
Sans aller l’dir’ à m’mèr’ éj’rint’ sans hésiter :
J’raconte mes misèr’, jurant que j’étos fort,
Que si j’étos pas grand, j’étos dur à l’effort,
L’argint qu’j’aros gagné, j’l’aros bien mérité.
Alors, el secrétair’, un homm’ plein de bonté
M’a dit : « Viens d’main matin, té conduiras l’baudet ».
Et ch’est depuis ch’temps là que j’connos tout l’villache,
Que j’connos tous les gins et tous les comméraches.
Et j’sais qu’ia des histoir’ que j’dos pas raconter,
Et que d’aut’ au contrair’ éj’ dos les colporter.
Quand j’sus dins min tom’reau, passant devant l’école,
J’ar’vos des camarat’ qui rient dem’ vieill’ cariole,
J’ar’vos l’instituteur, d’un sign’, j’y fais bonjour,
I crot qu’j’ai du malheur, d’êt’ par tous temps à l’cour.
Mi j’cros qu’in l’aime bien el tiot qui carrie chenne,
D’ailleurs éj’ m’in rinds compt’ au moment des étrennes.
Quand i fait frod l’hiver y’a toudis des brav’ gins
Qui m’crient pour boir’un verre et m’récauffer les mains
Et quand un homm’ i vot qu’mes bacs i sont trop lourds,
Sans même dir’ un mot, i s’amèn’ à min s’cours.
Quand un’ fill’ a s’marie, j’sus souvint damandé
Ya toudis des affair’ qu’min baudet peut carrier
Des bancs et des tréteaux pour ches gins faire la noce
Sont toudis l’occasion é d’récolter quét’ cosse.
J’ai vieilli dins l’métier et pis vlà que j’l’ai quère
Ch’est pas toudis bien gai et j’aval’ d’el poussière
Mais quand é j’rinds min mos avec tous mes dringuelles,
J’sus sûr que mes tiots frèr’ i front pas les poubelles
Charles BRUCHET