ch' fourneau
par minloute le, 02/03/2009cha trono au coin del cuisine, certains diront que chéto là pour à la fo cauffer l' mason pi cuire ché zaliments, et bin, chéto pour cha que chéto magique
achteure in appuie sur un bouton, et clac l' flamme ale arriffe, ou cor miu ché plaques ale cauffent dins coup ...
j' l a dis "clac" teut' pose pas d' question té fait clac cha s alleume et t arfait clac cha s eteint
quand que j arvos min père s occuper du fourneau , j' trouffe des points communs avec ché ch' minots dins l' temps qui s occupottent d' ché locomotiffes à vapeur
chéto l' drame au matin si ch' fu i s éto eteint dins l' nuit, min père i ayonno alors l' grille du fond et toute l' chinte ale quéyo d' dins ch' baquet du bas, alors après min père i preno cha avec précaution et y allo vider ché chintes dins zin coin du gardin, i s in servo quéqu' fo pour mette sul' terre, mais meme in faisant bin attention, y avo toudis un paquet d' poussieres d' dins l' cuisine aprés qui a ayonné
aprés i ram'no ch' papier journal qui metto in boule dins ch' fourneau, pi i metto par d'sus ch' pétit bois, et alors là , fallo pas l' déringer, chéto l opération délicate, d' alleumer l alleumette et d un geste sur mais qui m impressionno, i approcho l alleumette dech' papier et cha s embraso d un coup et pourtant y avo l' temps d' artirer s' main normal' mint, chéto un peu magique pour mi
chéto eune opération délicate que d' faire démarrer ch' fu, ouais pasqu i y pouvo y avoir des zartours d' queminées, que cha éteigno ch' fu ou au pire cha ram'no toute l' finquée d'dins l' pieche, qui fallo alors ouvrer l' farniete meme si i faijo fro déyors
eune fo que ch' bo i commincho à printe min père i nin rajoutto cor un tchio peu pi douch'mint i verso quequ' gaillettes dins ch' fu, pas trop d un coup quand meme sinon tout y s éteigno , zavez vu ché pas si facile qu' cha in a l air ....
eune fo ch' fu in route, i armetto délicat'mint l' couverque such' fourneau grace ach' crochet in fer qui inquillot d' dins l' queue in fer dech' couverque
tout comme ech' chef machiniste , min père i v'no d' temps en temps acouter ch'fu , raviser au miyeu l'couleur del leumiere qu ale arsorto du tchiot trou qui y avo au miyeu du couverque, et chéto grace à cha qui ouvro ou non ch' couverque pour donner un coup d' tison ou armette un tchiot peu d' bo ou quéqu' gaillettes ed carbon
les soirs ed grand vint, j' me souviens qu' min père i veillot a pas armette ed carbon , que meme i restot in momint en bas pour et' sur que ch' fourniau i allo pas s imballer et faire un fu d' queminée
ch' fourneau chéto eune corvée, fallo s in occuper , chéto un traval d homme, mais mi j' su sur qui a pas grinmint d' ménagéres qui argrettent ch' temps là, pasque pour ché femmes, in mettant d'coté l imache del caf'tiere qui éto toudis au coin dech'fu, faut pas oublier que cha am'no un sacré paquet d' finquées, et surtout d' poussieres à l interieur d' toute el mason, cosse qu in vit pu depuis l arrivée del gaziniere