cahier de composition 1
par minloute le, 09/12/2009d' ailleurs in savo l importance de chte cahier là, d abord comme j'dijo infreumé un bon paquet d' temps dins zeune armoire, pi aussi cha commincho par l'cérémonie, j' diro meme l' rituel d' la distribution
autant quand chéto des feules ou des cahiers pas trop importants ch' maite i donno cha à faire à un des eleffes du premier rang, un fayot bin sur, qu in s amuso à li faire discret'mint des croques en gampe pour qui s'ramasse à terre avec ché cahiers, autant là l' distribution ale éto faite par ch' maite in personne, que rituel, in tchiot peu comme la remisse du drapeau à un régiment
et queriche sul' gatiau , un détal peut ete mais un détal significatif, l' étiquette qui éto sul' proteche cahier chéto nin nous qui l' avotent rimpli , nan chéto ch' maite in personne ..........
cahier distribué, exercice dévoilé au tableau, chéto à nous d' jouer et vous les plus jones savez pas les risques, les chauss'trappes que chéto d'devoir tout faire avec un porte plume
pasque l' porte plume i pouvo nous trahir si in faijo pas attention, trop d' enque sul' plume, sul' feule paté assuré .... trait a la régue et artirache d' la regue trop vite , trainée d enque sul' feule, pleume pas vérifiée avant l exercice et risque d' devoir canger d' pleume in miyeu del pache, cha s' voyo tout d' suite chéto comme eune crevaison, in savo djà ach' momint là qu in auro des points en moins ...
parel aut' derniere faute , passer ch' buvard trop tot d un coup sec, risquiez d' déraper et cha laisso des traces, et si zattendiez d'trop pas facile d artirer l' maximum d un paté
pour artirer l' maximum d un paté d enque qui se s'ro formé, in preno sin buvard d' tous les jours et in essayo d in pomper l' maximum par eune pointe du buvard
mais pourquo que j' m'évertue à vous zexpliquer tout cha, achteure in fait pu cha, l' porte plume, l' buvard, l' encrier et l'boutelle d' encre in verre tout cha ché des r'liques ....................
eune fo ché zexercices terminés, ch' maite i ramasso les cahiers qui allo infreumer à nouveau dans l armoire
et j' me souviens que souvent l aprés midi i nous faijo faire du dessin, et durant ch' cours du qu on devo par exemple dessiner eune cruche, (nan pas mi , jle dis avant qui n a qui s' pose el question) durant ch' cours ed'dessin j' dijo, ch' maite i alo arsortir l' pile ed cahiers pour les corriger
chéto pour nous très troublant, pasque i avo des momints quand qu on faijo not' dessin et qu in raviso l' modele , in pouvo s impecher d' raviser ch' maite, et y a des coups in voyo qui éto pas contint, ou qui barro quéquosse sul' cahier , ou qui écrivo beaucoup, bin ach' momint là in oso pu l' raviser pasqu in avo peur ach' momint là d' croiser sin r'gard
déjà al' récré t avo souvint un "camarate" quit' diso " quand qui éto pas contint , i t'raviso" alors vrai ou pas, té passo eune mauvaisse récréation ........