cha sint l' roussi et dinguelle al' nouvelle année

cha y est in rimballe tout , ch' père noel qui éto accroché ach' mur, i rinte dins s' boite et y a eu du mérite, dins l' fro, sous l'pluie, meme qu in l a vu faire des tourbillons autour des' corte quand qui yavo du vint

parel pour ch' sapin, pour ché guirlantes, in rimballe comme à la fin du marché , sans joie, dins l' calme, ah in n intind pu les "laisse me met' l' boule rouche" "ché mi qui met l étoile tout in haut" " ché mi qui met' l'guirlante jaune" nan là ché in silence, et souvint ché l' mère qu ale ringe toute seule , faut dire que ché pas rigolo à faire cha, ringer les décorations de la noel ...

surtout que là in n a pu d' espoir, la noel cha nous parait djà loin, l' nouvelle année avec l' dringuelle aussi, i nous reste quéques jours, mais cha l' fait pu comme in diro asteure

in a pu eu d'raisons ni d' pretestes à pu réviser ché l'çons, à faire ché d'voirs ,pire y a pu qu'cha qui compte , réviser, faire ché d'voirs, arpréparer sin cartape avec l' fameusse phrasse "J ESPERE QUE TE FINIRAS MIU L ANNEE QUE TE L A COMMINCHEE"

faut dire qu in avo djà eu in aperchu durant l' journée du nouvel an, quand que Tante Untelle a s a pinché vers ti , d' maniere solennelle, in grand sourire pi quand que té cro qu ale va t' lacher l' billet qu'at' tend , ale l' artiens in dijant " j espère que té travale bin à l école ?" ti te fait ouais d' la tiete , in va pas s eterniser sur un sujet sensipe comme in diro asteure

in fait un tchiot "ouais" à peine audipe accompagné du plus tchiot mouv'mint d'tiete affirmatif, in espérant que l' mère al' ravise pas ach' momint là...

ouais faudro rester sérieux , et quand meme pas faire ch' paon quand que t as eu "pourro bin miu faire" sur tin carnet mensuel

et là quand que te dis "ouais" tout douch'mint, y a t' mère qui pourtant t éto sur qu ale discotto avec Mononque Octaffe, as' deminder si ale avo pas eune orele bionique , pasqu ale intind l' phrase que Tante Untelle at' dit " j'espere que te travale bin à l école" bin tin hoch'mint d'tiete affirmatif y est armis in cause par l' phrasse que t a l impression que t'mère ale crie d' l aute bout del pieche "J SAIS PAS SI IL MERITE"

là tet'dit "trahison" , alors cha dépint de quelle Tante Untelle t avo
les plus comprehenssiffes ale dizotent , in faijant semblant d' contredire et' mère "mais si que va travailler hein min garchon" in t'donnant l' billet et là té dit ouais avec l' plus grand sourire que te pourro faire, meme si aprés te croise l' visache det' mere qui parait moins radieux que l' tien

alors ti t a qu eune solution ché d aller t'perte dins les jupons des grantes personnes , loin del vue det' mère

y a aussi l' Tante Untelle , qu ale est pas rigolote, que quand qu elle entend t' mère dire" J SAIS PAS SI IL MERITE" , là sin visache à Tante Untelle i s' ferme d un coup , s' main ale artient ch' billet fermemint , et là teut' dit "ouh la ché pas gagné ch' t histoire là"

j 'vous rassure in l a ch' billet à la fin , mais faut que Tante Untelle ale t' fasse l' morale, surtout qu as' rinseigne des matières du que t es pas fort, et que te peux pas raconter d' cacoules vu que t' mère ale s a rapproché aussi et qu ale répond at' plache

"bon te promet que te va travailler ?" qu ale dit à la fin, qu ale ta réespliqué que "sans diplome te f'ra rin ,que te s'ra éboueux, que ché important l école" j in passe et des meilleures

là ti te print ch' billet ou plutot té sint que l' pression du coté d' el Tante Untelle ale est pu si forte, et parel te va aller t' perte inter les grantes personnes

à moins que , à la fin , t'mère ale dit donne me ché billets j' va les met' dins min sac te va les perde

cha y est tout cha ché d' l "histoire ancienne" l' école ché d'main, ah cha a passé vite

les vagances d' la noel ché comme suiffe eune étape du tour d'france au bord d' la route, té enervé , impatient que ch' p'loton i passe, i passe a toute vitesse que t éto cor in train d' raviser ch' premier que té voyo l' dos de ceux du miyeu et dins l' foulée l' derriere des derniers du p'loton

les vagances ed la noel ché parel

quo qu in pourro souhaiter à tous ché tchiots infants ?

tout d abord la santé, pasque djà pour eune personne agée, ché pas facile, alors mi quand que j' vo des zinfants à l hopital pour c' qu on appelle "des lonques maladies" cha m émeut et cha m' révolte tout à la fo

j' leur souhait'ro aussi du bonheur dins leu famile , à lire ou a vire régulier'mint des zartiques su les infants battus voir pire, j 'dis qui n a qui ont pas d' chance


la paix dans l' monte , voeu pieux mais ché toudis les populations civiles qui trinquent

la faim pasque vu tout c' qu in s a goinfré nouzautes pendant ché fetes .........................

d' avoir toudis sin papa et sa manman à la fin de l année, cha vaut aussi bin pour ché tchiots que pour ché grantes personnes

et surtout , ché min coté "poete" , cor accroire eune année d' plus , à Papa Noel ......