Souvnis ed guerre
par TIOT RITAL le, 02/02/2010Pneu d’vélo in temps d’guerre
Ah mes gins quaind j’vos les vélos d’course d’achteure, ej tranne gramint d’invie ! Mamère ! I n’d’a qui sont in carbone, pu léger qu’eine pleume si bin qu’in l’zé liève aveuc foque el tiot dogt. I z’ont de’ greusses jantes à raïons d’birouette (brouette), eine selle perquée à tros km du cade et quaind in role fèle (vite) cha fait eine terte musique comme cheulle du Tiot quinquin ! A si min père i’arot connu cha, i’arot eu si gramint d’plaisi qu’i s’rot dallé bin lon … ah tonnoire ed Brest ! Ouais, i s’rot dallé à Brest sins s’arrêter ! Menme pon à eine capelle (estaminet) pou printe eine pinte !
In parlant d’cha, cha m’ramintuve eine histoère qu’min père a vi. In preume, ej dos dire, os l’avez adviné tertouss, qu’min pére i’avot gramint ker el vélo. I’étot rétu (trapu, solide) , avot un cœur qui battot à 40 pulsacions et i n’tot jamais arcran (fatigué) ! Edon i volot êt’ campion cyclisse. Mais el guerre alle est arrivée et i'a perké sin vélo au guernier pis i’est dallé à l’cache à autrichiens dins les Dolomites. Après i sa insauvé dé sin pays faciste. Fini el rève ed campion ! Mais, sus sin vélo d’course, i’a toudis continué à roler, in preume pou daller ouvrer, in deusse pou sin plaisi, tout seu obin aveuc des comarates et pu tard aveuc mi. J’mé ramintuve un jour qu’in s’pourménot insanne, j’avos bin du mau à l’suire, mi l’jonne homme ed 16 ans alors qu’li i n’d’avot 54 !
Pindint l’guerre 39-45, in n’treuvot pon grand cosse à acater pou minger et cor moinse pou bocop d’affaires. Ainsin, quasi impossipe d’acater un pneu d’vélo, seurtôt un d’vélo d’course. Min père i immarvoyot pasqu’i in usot gramint pusqu’i dallot ouvrer in vélo, mênme à 40 km dé s’mason ! Mais dins s’tiète ed Rital, déquindant d’Léonard (d’Vinci, bin seur, l’peinte ingénieu) i’a treuvé eine riche idée : I’a fabriqué li-menme ses pneus ! Commint ? Ebin aveuc du tuïau d’arrosache ! Ouais ! I fallot in printe un assez dur mais pon treup mou, pis coper un morciau à bonne longueur pour couverre el circonférince dé l’jante moinse quèques millimètes Pis, à chaque débout du tuïau, bin amaniéré (adroitement) i passot un fil ed fier pau travers et i l’zé loïot pou bin l’zé saquer et arsaquer ainsin les quèques millimètes qui manquot au pneu. Ainsin el morciau d’tuïau i épautrot (serrait) gramint bin l’jante et povot pon s’insauver ! Cha f’sot des pneus à grande usance (solidité) !
A ch’momint là, i ouvrot dins l’forêt Mormal, à Locquignol, à 20 km dé s’mason. A l’démotié d’sin quémin s’treuvot el côte d’Orsinval, qui avot eine forme ed cuvielle. (cuvette). I’avot donc eine déquinte pis sitôt eine montée. Min père i’avot ker ed déquinte in pédalant comme un damné, l’nez su l’role avant. Ainsin, aveuc es’ n’élan i armontot el démotié dé l’montée. Ch’jour là, i’étot arrivé au bas dé l’déquinte, édon à s’pu grande vitesse, p’têt’ 80 km à l’heure, quand d’un cop …pan ! i’archot un rude cop sur s’dos si fort qu’i’a manqué d’kéir in favelotte (s’évanouir), in dit aussi kéîr dans les peunnes et d’plonquer (plonger) dins l’fossé ! I’arot pu finir din un lusiau (cercueuil) !
Maugré qué s’tiète, in pleine tourbision (prise de vertiges), véyot plein écleuittes (éclairs) et 36 candelles, i’a l’forche ed freiner et d’s’arrêter. Ehansé (essoufflé), fersonnant, ploïé su sin vélo, tout cru d’caud, i respire à grand cop et s’ravigore (se remet) tout douch’mint. Adès, i ravise les waréchaix (paturages) et bos d’aspe (taillis) aux alintours pou vir queul biec bos (sot) a pu li bailler un tel cop d’baton. Peursonne ! Si’avot eu quéquin, seur i’arot archu eine rute dépourée ! I ravise el quémin et vot …quo ? Là, pu lon à 20 mètes… un viert serpent ed 2 mètes ed long tout crompi (tordu)! Maugré sin grand mau, i'est pris d’un grand riage comme chti d’un bochu !
El serpent ? …. Ch’tot l’morciau ed tuïau d’arrosage ! Ouais ! El loïage ed fil ed fier i s’étot brisié et l’morciau d’tuïau ainsin libe, au momint dus l’role tornot l’pu radmint
(au pu vite), s’étot déploïé et avot louqué (tapé fort), aveuc eine forche ed diape , el dos d’min père comme eine matraque ed CRS !
"Souvnis ed guerre" pa Tiot Rital