L' timps du Nord par Lucie Krawczyk
par Lucie Krawczyk le, 15/04/2010In dit toudis qué dins not' région, y n' fait pas biau, y fait frod, l' ciel y' est gris,...
Cheux qui diss'ttent chà, ch'est d' rutes minteux car chez nous, aussi, in a parfôs caud, p' t' êt' même puss' qu' dins l' Sud !
Alors, pou' rinte hommage à not' climat dé ch' Nord Pas-d'-Calais, v'là eunne poésie pou' contredire tout c' qu'in in dit !
L' TIMPS DU NORD
Quind in intind chés gins dé l' météo,
Dins ch' Nord, y n' fait jamais biau !
L' solel, y' est jamais au rindez-vous,
Pou' nous, y n' n'a jamais beaucop !
Faudrôt qu'y z'arrêttent un t'chiot cop,
Ed' printe chés Nordistes pou' des fous !
L' timps dé ch' Nord, ch'est pas c' qu'in n'in dit,
Même si y trouv'ttent not' ciel toudis gris !
Si à l' météo, y' n' sont pas contints,
Eh bin, à mi, chà n' me fait rin !
Y peuv'ttent dire tout c' qu'y veulent,
Mais, 'jourd'hui, j'ouf' tout grind m' gueule !
Chez nous, ch'est p' t' êt' pas l' Paradis,
Qu' chés Môssieurs d' Paris aurôttent chôsit !
Mais j' vous rassure, mes sottes gins,
Qu' du solel dins l' coeur, in n' n'a plein !
Alors, leu' biaux discours et belles z'histoires,
Y peuv'ttent les ringer dins leu's tiroirs !
Ichi, ouais, tout l' monte vous l' dira,
In n'est pas diffichile, in prind c' qu'y' a !
Et si malgré tout chà, chà n' vous plaît pas,
Tint pis, mais nous, in est heureux comme chà !