A ch' méd'cin par Lucie Krawczyk
par Lucie Krawczyk le, 19/04/2010A CH' MED'CIN
'Jourd'hui, j' sus partie à ch' méd'cin,
Pass' qué j'allôs pas vraimint bin !
D'pis que'ques jours, ej' me traîne,
Et quind j' sus malate, mi, chà m' gêne !
J'a gramint d' môs à min dos,
A forche d'avoir, au gardin, fait des trôs !
Min nez y coule, j'arrête pas d' tousser,
Quind eunne quinte vient, in dirôt un silicosé !
Ch' docteur, y' a pris m' tinsion,
Pou' li, ech' chiff', y' est pas bon !
Pis, y m'a ausculté, et vu s' n' air,
J'a compris qu'y faudra gagner l' guerre !
Y m'a inscrit tout plein d' médicamints,
Quind j'a avalé tout chà, ej' n'ai pus faim !
Y m'a fait eunne liste phénoménale,
Chà n' vas pas plaire à l' Sécurité Sociale !
L' pire dins toute ch' t' histoire,
Ch'est quind té lis chés t'chiots papiers,
Qu'in trouf' dins chés boîtes ed' cachets !
L' méd'cin m' les z'a inscrit pou' m' guérir,
Mais final'mint, j' vas incor' puss' souffrir !
Et quind j' lis tout c' qu'à côté, j' peux attraper,
Vingt diousse, ch'est là qué j' me mets à prier !
Eunne fôs pris tout chés pétits cachets,
Ch'est bizarre, j' sus toute drôle et fatiguée !
Et quind j' mets toutes chés pommates,
Eh bin, mes gins, j' sus incor puss' malate !
Ch' méd'cin m'a dit qu' dins eunne semaine,
Faut r'vénir el' vire, mais chà n' s'ra pas la peine !
A cause d' sin foutu trait'mint,
Qui m' fait vraimint pas du bin,
Sôs j' vas guérir, sôs j' vas mourir,
Alors, pourquô j' va aller l' vire ?
In m'a dit aussi qu'y fallôt tout arrêter,
Dé n' pus rin printe, ed' tout stopper !
Bête et disciplinée, j'a fait comme in m'a dit,
Ch' t' un mirac', j' sus tout ragaillardie !
In m'a dit aussi : "Ch'est psychosomatique,
Si t'as l' moral, chà s'arrête, ch'est automatique !"
J' sus p' t' êt' un cas d'étut' pou' l' science,
Y vont sûr'mint m' trouver un brin d'intelligence !
Mais j' vas vous laicher ichi, mes ami(e)s,
Car, d'un cop, j' mé sins tout ramollie !
Pou' chà, y' a qu'eunne solution, v' savez,
ch'est dé s' mett' au pieu pou' s'arposer !
Mais j' crôs qu' j' vas finir dins l' fauteul,
J' peux pas aller pus loin, j' vas tourner d' l'oelle !