Des jueux professionnels? Nan, d'z'infants gatés !
par TIOT RITAL le, 21/06/2010Incroyabe ! Diminche, à l'Cope ed Monne ed fotbal, nos jueux (les bleus) i z'ont fait grèfe ! I n'sont pas dallés s'intrainer ! Porquo? Pasqu'i sont pon bénaches qu'in a rué à l'cour un comarate qui avot déhutté (sorti) d'greux mots cont l'intraineu à l'mi-temps d'un match! Comme cha s'passot dins l'vestiaire, i cach'te l'personne qui a rouffionné chu qui s'a passé à eine grante gazette sportive ! Et bin seur , el gazette alle a marqué chés mots in grand ! Ainsin adultes et malhéreus'mint l'z'infants i z'ont pu l'zé lire in passant edvant l'marchand d'gazettes! Zéro pointé à l'gazette armueuse ed bren !
Eusses les millionnaires i z'ont fait grèfe ! Adès , ej busie à min pére , maçon d'métier , qui pou bailler eine tartène ed pain à ses infants , i'est déquindu faire el carbonnier à Marcinelle (Belgique) ! Ej busie à tous chés carbonniers qui ont ouvré dins d'durtes conditions au fond des bowettes in respirant l'pourette qui donnot l'silicosse ! Ouais , eusses i pouvote faire grève ! Ch'tot jusse !
Partout in Europe , in rit dé ch't'histoère ; in s'moque d'nos jueux ! Pire , in s'moque d'not' France !
Mi, cha m'donne pon invie d'rire ni d'braire. Nan ! Cha m'donne l'invie d'vomir !