brouillard
par minloute le, 26/08/2010minloute y est l heure d' et' lever !
ouais j arriffe !
d' ailleurs j'savo qui éto l' heure d'es' lever, j avo intindu m' mère passer ché oranches dans l' machine , pour que je l' bo avant d avaler min chocolat
ché pour cha ptete, que j' l a jamais vraimint apprécié, du jus d' oranche avant l' chocolat
j' me leffe et j intinds les carettes qui roultent moins vite qu à l habitute, pourtant in intint pas ché pneux rouler sul' route mouillée
cha do et' aut' cosse
à raviser par l' farniete in a vite compris, ch' lampadaire in face ché pu qu un halo d' leumiere
j' reste un momint à raviser l' brouillard , traversé par l' lueur des phares
au coin del rue , cha y est ché grante discussion, y a ch' Zeff, Louis, pi Mr Lemaire
j' les intinds parler, faut dire que ch' Zeff y a eune vo graffe, i fait pas caud, sont bien arvétus, ch' Zeff et Monsieur Lemaire avec leurs gapettes, et Louis avec sin beret
cha discute sec, mais cha oublie pas d' dire bonjour si y a eune voisine qu ale passe à coté, toudis un mot gentil du genre "in va pas et' attaqué à betes d' oraches aujourd hui hein Madame untel" et les arvlà qui arcomminchent leu bavardache
cha y est cha klaxonne, ché ch' camion d' carbon qui rinte dins l' rue, "ché pour qui " qui dit ch' zeff? "i va au fond , cha dot et' pour ch' père untel" , "bin i va rigoler pour l' rintrer sin carbon, ché un coup à printe un coup d' caud et de ch' temps là ché pas bon"
"bon ché pas d' tout cha, mais faudro aller querre ch' pain" et ch' trio i s' sépare , in qui rinte as' mason, l' aute qui va querre ch' pain et l' troisieme qui reste au bord , à raviser ché carettes passer
inter temps j' su déchindu minger , habillé, pris min sac et hop direction ch' lycée
dés qu' té sort , cha t' print toudis un tchiot peu à la gorche quand qui a du brouillard, comme si ché particules de scories des terrils étotent en suspension dins l air
j' avinche sul' trottoir, ché carettes éclairent bizar'mint l' route et les passants , qui arsempent un peu à des fantomes
cha y est j arriffe in face ed ' mon ducrocq , j' traverse et j va au d' vant d' min camarate qui habite rue raymond deruy
in s' arconno vraimint à moins d' 10 metes les uns des zautes
on artraverse la rue anatole france, in passe d' vant ché magasins du que ché alleumé à l intérieur , l' boulangerie d'chez Maréchal, ch' marchand d' légueumes monsieur Leroy, ch' café Vanvimersh, qui djà quand qu in passe d' vant , laisse eune odeur d' biere such' trottoir
plus loin l' quincaillerie d'chez Cadot , pi l' phramacie
in intame l' déchinte del cote des grands bureaux, in fait attintion du qu in met les pieds , in n y vo pas grand cosse , in passe pas loin d' la station d essence face au garache Bondues
d' là in vo ché gins qui sont djà au café des sports, chti qui fait l' coin à la rue d' la gare et qui éto un fief d' boxe
j in vo cor un , debout au comptoir , sin casque d' mobylette sus ' tiete , qui buvo sin café et qui y verso sin g'nief ed' dins ......
in déchint la cote des grands bureaux, in est plus nombreux aussi, tous les jones d' bruay in ache d aller au lycée se dirichent vers l' centre ville, le cercle comme in diso par ichi
si in éto in avinche in rintro boire un café ou un chocolat à mon du café d' la paix pi aprés y éto tout juste l heure d ' monter ché marches rouches du lycée avant qui freme l' grille
et ché cours allottent bientot commincher