Les jardinsGrenay, mon papa à la Fosse 11 en 1947
par Marie-Claire le, 24/09/2010Min papa i a travaillé à l'fosse 11 après la guerre mais i a pas été gramin au fond , i a du y faire queques semaines et après i a travaillé au jour à l'machine d'extraction jusque vers 1965 dù qui est parti à CDF chimie à Mazingarbe jusqu'à l'artraite in 1981, i étot resté sous el régime des houillères
Faut dire que min père i s'sintot pas bien à travailler au fond, i avot ker la nature et el traval ed la terre et i avot travaillé queques années dins eune since
Pindant la guerre y avot 16 ans in 1942 et i travaillot dins eune ferme à Loos en Gohelle, min père i étot taquin, y avot peur d'arien et em grand mère Pulchérie as rongeot les sangs pour sin fils unique. Du coup ale l'a invoyé in Auvergne amon d'es belle soeur et min père a fini la guerre là bas à travailler aussi dins eune ferme, ch'étot cha qui li plaijot
A la fin d'la guerre i est arparti à Paris avec eune aute ed ses tantes et s'n'homme qui avotent aussi passé la guerre in Auvergne amon del tante Julienne, et là ben i s'sintot pas mal à Paris et i étot pas pressé ed rintrer
Pindant ch'temps là em grand mère ale avot pus gramin d'nouvelles, mais surtout ale le croyot toudis in Auvergne et ale a appris qui étot à Paris, et là ale l'a imploré d'arvénir à Grenay ..
Min papa, bon garchon, i est rintré à Grenay et chés trois photos prises ale Fosse 11 que j'vous mets ales sont de 1947 , un momint après sin retour sans doute après sin service militaire, y avot 21 ans
la in dirot qui traval ach'parc a bos , avec sin bidet y devot s'arvir din chés sinces , d'auvergne
( 3 photos)
