le hachis parmentier

chéto cor eune aute solution pour finir ch' reste d' boeuf : le lachis
alors , pour les plus jones, croyez pas que le lachis qu in mingeo à l époque cha arsonno au lachis qu in trouffe asteure dins ché magasins, sorte d' paté à tchien misse dans un fond in alu, prèt à et' incrinqué au micro ontes et allez in route ch' repas i est fait ...

mon diu que malheur , cha n a rin à vire, ch' "lachis " d asteure, y a pas d' consistance, pour mi ché del purée industrielle préhachée, hachée, pulvérisationnée, arconstituée , et que d' dins in va laisser querre d' temps in temps un morciau d' oignons et un bout d' viante qu in sait pas c' que ch' est , tout cha pour qu in appelle pas cha tout simplemint "purée" .... ch' lachis là in pack alu, ché "aussi bon " que l' brandate d' morue que té peux acater aussi in pack alu
l' seule différence entre les 2 ché que dins l' brandate au lieu d' met' del viante à tchien, i dovent mette tro quat' morciaux d' pichons vietnamiens ,savez les mangas , ou un nom comme cha, et pif paf, j' t imballe l' tout et cha s appelle brandate
ah mes gins si zavez pas connu l'vraie base du lachis, chéto des pétotes écrasées, mais savez pas industriel'mint .... in mingeant té pouvo querre sur des tchiots morciaux d' pétote cor intiers ...et pi l' viante , l' viante... M'man ale sorto le hachoir , véritape instrumint d' torture qu ale coincho au bord del tape , et là M' man ale deveno magicienne ..
mi, m' tiete posée au ras del tape, et j' le voyo couper des morciaux d' viante , les incrinquer par le haut d' l apparel , appuyer d'sus so avec une espéce de tchiot baton avec eune poignée rouche , et d' l aute main ale tourno l' manivelle, et té voyo sortir par in bas , comme si chéto cor vivant, l' viante s' tortiller par ché trous ....
Curieusse opération, in haut chéto del viante in morciaux et in bas chéto d' venu tout fin ...
si j éto sache, ou alors que m'mère ale tourno l' dos pour aller querre aut' cosse, j' pluquo in tchiot morciau et j' trouvo et j' trouve toudis cha bon .......
j' vous avoue qui a des momints j avo peur aussi , pasque y a des coups m' mere ale pousso l' viante avec s' main sans printe ch' bout d' bo et j' craigno d' vire passer ché dogts par ché trous d in bas
pour in arvénir al' comparaison avec le vrai lachis et l' bouillie industrielle, y a cor quéquosse au d'la la viante, des pétotes, des oignons, et meme des tomates que m' mere ale métto aussi ...chéto la chapelure, ah la la, rin a vire avec ch'te poussiere qui nappent ché bouillies, nan del vraie chapel'ure, faite manuel'mint, avec du pain d' la veille
ché vraimint c' qui s appelle l art d accomoder les restes ...

dépêche te d'invoyer el'suite j'ai faim , même si j'sais avec quoi yétot fait tin hachis parmentier , j'el dirai pas