ch' temps chi la Toussaint 1
par minloute le, 15/10/2010j' me souviens que m'mère ale resto à coté d' min père durant ch' momint du qui s' recueillo ,comme un soutien, mi cham' faijo tout drole d' vire min père presque vulnérape, garde arbaissée, mettant à jour tous ces sentimints
j'cro aussi qui s'rappelo tous ché mauvais momints qui avo vécu au décés d 'sin père, y avo 13 ans, s' mère et li ont du aller habiter ché eune soeur et quitter l' mason des houillères, ché ach' momint là qui a eu des ennuis d' santé et qui a fait un premier séjour à berck ,tout seu à l hopital durant eune année, fractionné par des visites d'es ' mere peu fréquentes à ses ziux , eune fo par mos, mais l'manque d argent faijo qu ale pouvo pas v'nir plus souvint
aprés , i s artourno vers Maman , pi chéto comme si i arvéno avec nous , dans ch'monte présent ..
ché pas pour cha qu in quitto l' cim'tiere, in allo sur deux zautes tompes eune dans l'meme allée, l aute queques zallées plus loin, là chéto des gins que meme m'mère ale avo pas connu ou connu à peine , chéto del famille am' grand mère maternelle
min père i déposo eune fleur ichi , eune fleur là, "té montr'a ché fleurs au cimétiere hein Léonce" qu ale dijo eune cousine à min père plus agée qu' li
ché pour cha qui montotent au cim'tiere pas à vite mais avec plusieurs paniers remplis d' chrisenthemes
in allo aussi s' arcueillir sur l' tompe d' gins que j' connosso pas mais que cha faijo pas longtimps qui zétotent décédées vu qu in voyo pratiqu'mint pu l' caveau tel'mint que chéto cor rimpli d' bouquets et d' couronnes.......
in arpartant chéto bin rare si min père i croiso pas quéqu un qui connaisso, al' reflexion quand chéto un ouvrier ou un ancien ouvrier i l'vo s' casquette , i rincontro pas que d' anciens collègues, mais aussi des camarates syndicalistes, et meme si l' discussion ale duro pas des heures, et meme si faijotent attintion d' pas parler trop fort, in éto pas toudis sorti facil'mint du cimetiere, et cor si i rincontro pas cor quéqu un sul' bord du parking ....
après in allo au cimetiere d' labuissiere , in allo sul' tompe à m'grand mère maternelle , pi à sin frère , mais chéto pas l' meme cérémonial , ché bizarre à dire , autant l' cim'tiere du 3 j l a toudis vu comme un "vrai" cim'tiere, autant chti d' labuissiere j avo pas l' meme sentimint
d'abord i est à coté del route nationale, pi depuis les années 70 , t as ch' supermarché Cora qui est juste in face .... et faut dire que cha s arringe pas vu que comme j' la djà dit , i zont meme construit des nouvieaux batimints commerciaux, dont un garache , que cha surplombe presque ch' cim'tiere asteure ....
Et surtout j' cro que chéto pas l' meme mentalité inter min père et m' mère, min père éto beaucoup plus sentimental que m'mère , et quand qu in resto d' vant l' tompe d' ses parints, ale oscillo à peine l' tiete , pas d' larmes et après quand in arparto ale éto toudis parel, comme si elle, ale avo pas laisser entrevoir à un seul momint, l' ptite file qu ale avo été ...