cor chinq mineutes pi au lit toudis la suite
par minloute le, 03/11/2010quand qu in rintro à nouveau dins l' mason in devo arjointe nos plaches, tout in évitant l' maitresse d' mason qui apporto ché fameux plats qu in allo d'voir ingurgiter
"ché quo qu in minche ?" , del dinde , "mi j a pas ker cha" , mais si té verras, y a del sauce pi del mayonnaisse que j a fais mi meme ..., "j a pas ker" , té n 'aura qu un tchiot morciau
là aprés avoir jué à l extérieur, in voyo l' différence quand qu in rintro à nouveau dins l' pieche , d' abord au plafond cha commincho à et' " Macao l enfer du jeu" avec eune couche d' finquée d' tabac qu ale avo du maux à s évacuer , in allo quand meme pas ouvrer ché farnietes dech' temps là quand meme
mais l' pire chéto pas cha , chéto l'nompe d' décibels qu in s' prenno dins les nifflettes, à croire qui zavottent d' plus in plus d' mal à s' intinte pasqui parlottent d' plus in plus fort, pour vous dire : in s intindo pu ....
en fait , plus ché plats i s' suivottent moins in éto surveillé et moins in raviso c' qu in mingeo vraimint nous les tchiots
bon y avo bin eune mère qu ale véno pour couper l' viante à l'plus tchiote, à nous incourager à minger d' tout :
"faut minger d'tout , té verras plus tard té va aimer cha" , mais ale arparto rapid'mint s assire as' plache, chéto sin tour d et' servie ...
nous in in profito pour ardéchinte d' tape, et aller arjuer dehors , bon ché sur que taleure in pas'ra du temps à artrouver l' écharpe d untel, l' deuxieme gant qui restera introuvape jusqu au soir ..... l' tout chéto qu in jue insempe sans qui a d' bagarres, fallo pas qui n a un qui rinte al' mason in pleur, l' nez ou l' bouque in sang , in ahanant " ché untel, i m a tapé"
là cha pouvo finir vilain cht affaires, rintrache d' urgence d' tout l' monte pendant que l' maitresse d' mason et l' mère d' l infant qui brayo ale zétotent in train d' li mette eune pommate à sin g'nou égratigné, ou à mette un bout de ouate dins sin nez, c' qu il faijo braire cor plus fort
pindant ch'temps là y avo expédition punitiffe des zommes pour artrouver chti qui avo fait kerre ch' plus tchiot , et souvint aux cris du grand blessé, in intindo les cris du père qui gueulo, pi rapid'mint l' bruit d' la clique, suivi bin sur des pleurs de l agresseur ....
mais cha duro pas longtimps y avo un nouvio plat qui arrivo sul'tape et in éto tous consignés à not' tape jusqu à la fin du r'pas, c' qui nous impécho pas 10 mineutes aprés , in ayant promis d' juer douch'mint, aprés avoir intindu les consignes des parints, d aller arjuer dins ch' gardin ou dins l' courette