dans l' bouillon tout est bon
par minloute le, 16/11/2010j a arpris l adage qu in donne au cochon, dins l' cochon tout est bon ....dinch' bouillon aussi
in l a djà mingé la veille à midi,là y est "présentape" , ché légueumes i sont pimpants, cha sint bon, l' viante ale est cor bin collée autour d' l os à moelle .....
l' sauce tomate et ch' riz ché pret à et' servi allez in minche d' bon coeur
l' soir in fait récauffer ch' bouillon, on l agrémente d' vermicelle , in mets ché biscottes sul' tape , aprés in arcauffe ou nan ché légueumes, cha dépindo des habitutes des gins, donc soit al' castrole soit eune partie des légueumes frods in salate avec d' zéchalotes
pi aprés ch' riz qu in sert avec l' sauce tomate qu in a armélingé avec dès la fin du r'pas du midi
mais i reste cor du bouillon l' surlend'main oh d' quo faire 4 assiettes ché tout , in va ti l' jeter ? nan ché s' fait pas cha, mi in m a appris à respecter l' nourriture, j avo pas interet à faire des boulettes d'pain , d ailleurs mi asteure ché un truc que cha m' fait bondir, j a invie d' rajoutter l' phrasse qui dijo toudis min père "in n' a qui minchent pas" ............................
donc i nous reste du bouillon, mais l'laisser comme cha, et l' arservir au soir, y a des coups j' su sur que cha vous est djà arrivé que l' soir ch' bouillon i avo un tchiot gout d' suret , et ché pas terripe
mais j avo prévu l' coup, j avo acaté hier un morciau d' lard , del poitrine si vous préférez , alors quo qu' ja fais, j a mis ch' lard cru dins l' cocotte du qui a ch' reste du bouillon .....
commint vous décrire cha ..ché légueumes à forche d 'et' cuits et arcuits i zont caramélisés, et dinch' fond del cocotte y reste que des tchiots morciaux souvint délités à forche des cuissons : morciaux d' carottes, d' navets, d' celeris ou d' porions.......
ta déposer ch' lard dins l' cocotte, et là ch' lard is' dit, "ah in m a pas mis dans eune simpe cocotte et in route....nan , j' va et' parfeumé avec ché legueumes et ch' bouillon", et là ch' lard is 'dit, "jva donner l' meyeu d' mi meme pour faire honneur ach' plat"
mais meme ch' bouillon i sait qui vit ses derniers momints, parel, i s' dit , j' va pas mourrir comme cha , sans panache, alors ché carottes, ché porions, ché navets , ché celeris i s' donntent à fond pour donner leurs derniers sucs ........
ché un mariache d amour, entre ch' lard et l' bouillon, et comme tous les mariaches d amour, ch' résultat y est à la hauteur .....
à la hauteur zavez dit ? zavez djà vu ch' lard quand qu in l'sort del cocotte, encore arcouvert par ch' porion qui in peut pu, ché bouts d' carottes in vrac, et l' celeri , que té sait pu si ché du cel'ri ou du navet , tel'mint qui est mate par l' dernier combat qui zont donné
pas esthétique ,j' vous in conviens, mais asteure , tout cha ché dans eune assiette, ché parti au frigo, et cha va avoir l' temps d' s arposer , pasque ché prévu que d'main soir direction min stomaque ...
alors et' n'estomaque y va argargouiller ed' plaijir ,
mi nan pu ech' jette et rien , tous chés restes y sont bons ,
samedi em femme al a fait des patates au four , avec sauret beurre et paté , el lendemain , y in restot al les a copées un deux , al mis del farce ed' j'sais pas quoi , al a fait recauffé et bin tout ya passé , et des fos si y in reste pas assez , bin j'minche in tartine ed' beurre avec , em mère al dijot toudis " tout fait penche " et din l'temps fallot faire un effort pour in laicher un tiot peu pour ech'kien
( 1 photos)