dinch' tiroir del tape d' l' arriere cuisine suite

in voyo M'man verser l' farine dinch' saladier transparent, pi la vire jongler avec ché zeufs
là fallo rin dire, pasque chéto l' momint délicat du qu ale casso ché zeufs sul' coin du saladier (momint bizarre ,presque sauvache , j' éto persuadé étant tchiot que du fait qu ale casso ché zeufs , que chéto m'mère qui arreto l' processus qui allo faire qu' des pouchins i zallotent arriver.... mais que voulez vous fallo bin minger aussi) .....
eune fos l' euf cassé, ale faijo comme un momint d' jonglache tout cha pour séparer l' jaune du blanc, et eune fo l opération réussie , ale metto l' jaune au miyeu del farine et cha faijo comme eune mini explosion , eune mini gerpe d' farine ,qui n' dépasso toutefois jamais le rebord extérieur dudit saladier (comme que j' causse bin mi j' m étonne mi meme , personel'mint moi je )

aprés ale metto ché ingrédients magiques, l' sucre vanillé et l'levure alsacienne, sachets magiques , coupés précautioneus'mint pi vidé dins l' mélanche du saladier, produits magiques qui allotent selon m'mère permet' ach' gatiau d' lever pi d avoir un bon gout , in éto près à mes zieux , d' l alchimie .....
pindant ch' temps là j avo l'dro d' juer avec l' fouet à manivelle .......que drole d engin in auro dit les anciennes mitrailleuses savez, fallot tenir ch' fouet d eune main, et tourner l' manivelle d' l aute, et là chéto magique , in voyo tous ché rouaches s' mettent in route, et plus te tourno vite l' manivelle, plus vite ché batteurs in d' sous i tournottent vite
ch' éto d ailleurs eune enigme pour mi, in tout cas cha m a permis d' me poser la question : commint qui faijotent ché 2 fouets du batteur pour tourner comme cha sans jamais s' rincontrer, toudis incrinqués les zuns dans les zautes ....... j' y jouo mi comme si chéto eune mitraillette, oh j avo pas l'dro d' tuer des ennemis in dehors d' l arriere cuisine, pasqui fallo pouvoir ardonner rapid'mint à m' mère au momint précis qu ale in aura besoin
aprés m'mère ale m' prenno des mains ch' fouet, ale le metto dinch' saladier au miyeu del farine , des zeufs et del levure ,et allez in route .......... au début chéto un peu dur pi plus qu alle allo, plus vite cha s' mélangeo .....

chéto eune tape in bo, qui avo djà servie, ale avo été l' tape d'leu salle à minger quand que mes parints i zavottent comminchés à viffe insempe , pi avec les 3 premiers infants qui sont arrivés (beaucoup moins interessants qu' mi qui viendra bin plus tard) l' tape ale a rapidm'int éto trop tchiote
ale a donc poursuivi s' carriere, car ach' momint là quand té jetto , jesus marie joseph, fallo qu' cha so complet'mint cassé sinan chéto du gaspillache ,et là chéto au minimum le blame absolu d' la part d' min père..............

arrivée dins l' arriere cuisine, ale a connu plusieurs couches d' peinture, à la fin des ' carriere ale avo les pieds bleu foncé
à forche d' met' d'sus des plats cauds,meme avec eune serviette in d'sous, l' tape ale éto "léger'mint" bombée ...... chéto d ailleurs un drame, pasque j avo ker juer aux cyclistes, savez ceux in acier ou les zautes plus modernes , tout in plastique, fallo pas donner l' moindre coup al' tape quand té les disposo sinan t éto sur que cha finisso en dominos géants ...
aprés cha a été ch' tour, savez eune espéce d' feuillard in acier, cloué tout autour del tape, qui a comminché à s' détacher, et meme as' couper
Min père i l a rafistolé j' sais pu l' nompe d' coups .... Pi un jour l' modernité ale est arrivée, chéto aprés les rénovations d' 1978 1979, ouais chéto l année qui nous arfait tout l' carrelache del mason, pi ouvré un peu plus l' acces à l arriere cuisine, mi ché ouatères dans un sas à l entrée, pi transformé les premieres barraques d' min père , à savoir l' barraque à carbon et l' barraque au bois .....
Imaginez mes gins, un carrelache tout neuf, des ouateres que té pu obligé d' sortir dehors pour aller faire ed commission qui drache ou qui gele, ch' fourneau cassé remplacé par eune chaudiere à gasse , sans oublier l arrivée du téléphone et j avo oublié LA SALLE D 'BAINS , fini l' bassine in plastique pour s' laver dins l arriere cuisine ...................bin là in n' a profité pour canger d' canapé et min père i a acaté un grand meupe blanc , en espéce d' mélaminé , mais rin à vire avec les meupes d asteure...

Ch' meupe là pour vous dire y a servi 30 ans et savez fallo qui soit resistant pasque ché tiroirs et ché portes cha a été ouvré j' sais pas combien d' fos durant ch' temps là ...... imaginez un meupe dins l arriere cuisine , d'puis l' départ du fourneau cha avo libéré eune sacrée plache, un grand meupe du qu' dins in pouvo mette tous ché couverts, ché serviettes, ché ustensiles , ché faitouts, l huile vinaique etc etc .......
du solite que j' vous dijo, l' preuffe a la fin qu ale éto cor as' mason , m'mère ale voyo pas bin clair et quand qu ale arroso ché plantes, in n avo autant dinch' pot qu autour , alors pour que ch' mélaminé i tienne l' coup , fallo que cha so pas del gnognotte

tout cha pour vous dire que l' arriere cuisine ché d'venu d un seul coup plus spacieux , plus ergonomique pisqu in trouvo tout sous la main, et s' est posé l' question pour l' tchiote tappe, ah cha ale la pas vu v'nir cha, ale a du s' dire , bin là i vont m armette au miyeu comme avant, bon ché vrai que j'géno un peu qui fallo faire attintion avant quand qu on tourno autour d' mi avant, mais l' probleme i s' pose pu , avec ch' fourneau artiré ....
té tombé de haut ti , si in peut dire ...pourquoi laisser eune tappe là au miyeu qui sert pu à rin ? et un beau jour, j' sais pas si chéto un bio jour, in tout cas pas pour ti, in t a pris d' chaque coté ,et in t a am'né al' barraque , l' barraque au carbon ..

mais comme yavo pu d' carbon et d'puis un momint d ailleurs pour vous dire, mi j avo toudis connu ch' carbon au fond del' caffe ..... mais surtout que l' barraque ale avo été arfaite, y avo del plache, donc ché là qu ale a fini s' carriere , là , au milieu del poussiere ...
d' sus min père y a mis eune paire d' cartons qui "pouvotent cor servir" , eune tchiote boite à outils, et ché là que j allo dire, t avo fini t' carriere 30 ans plus tard .....30 ans dins l' barraque .....

ironie d' l histoire quand meme, quand qu on a vidé l' mason dem' mère , les deux i zont fini tous les deux chez Emmaus , pas d' jaloux ......et j' me diso que j' su sur que l' tchiote tappe in bo , eune fos décapée, ale a du artrouver plus rapid'mint eune nouvelle mason que ch' meupe blanc, qui , li en fin d' compte avo plus subi les outrages du temps ........
si l' tchiote tappe in bo ale pouvo écrire un liffe de tout c'qu ale a vu et vécu, cha f'ro eune sacrée collection ......