Em' lampe, d' Isaïe Lampin
par PAILLART André le, 28/11/2010In nous a imbauché tertous incor'inn' fos
Mais ch' n'est pas pour ouvrer, in nous fait un cadeau
I' a l'armisse ed chés lampes quand in est pinsionné
In nous verse u canon, in l'a bien mérité
Et pis pour pas mintir in artreufe ses copains
In est cotint d' s'arvir, in passe in bon momint
In ravisse tous sin vinte, in a un peu grochi
In raconte inn' bétisse, in a bien du plaisi
In érot pu à nous, nous armette un martieau
D'autant pus qu' dins nou vie in l'a eu sous dogts
Mais à ch'teur ch'est la mote nous au jour comme au fond
In s'artreufe là tertous aveuc sin tiot lampion
Mais l' tiote source ed' lumière qu' j'ai chi intre mes mains
Si all' pouvot parler, all'dirot à chés gins
Tout l'travaail qu'all' a eu aveuc nous brafes mineurs
Pour aller faire au fond, el pus dur des labeurs
All'étot bichonnée par nous pétites lampisses
Eusses qui préneutent 'é bien soin, pour qu' chés cuifes i z'arluichent
In véyot dins leus yux, monter comme inn' prière
Surtout prin bien bien soin d'eux, donne leus bien la lumière
Alors nou mineur i l' prénot aveuc inn' grante fierté
Ele qui n'allot pus l' quitter pindant inn' sainte journée
Ch'est comme si qui l'avot el'bon diu à s' chinture
I'avotconfiance à elle, in l' véyot su s' figure
El' lampis'trie dins l' temps, ch'étot quette cosse ed'bieau
Ch'étot comme un marqué dû qu'in vindot ch' boulot
Ech maîte ou bien ch' porion i rassemblot se troupes
Alors nou pétite lampe all' n'in perdot inn' goutte
In véyot monter din tous ché escaliers
Comme inn' loque procession ed' tous chés tiots quinquets.
Et pis inn' dernière fos avnt d'rintrer dins l' cache
I raviseutent leu flamme, cha r'donnot du corache
Alors ch' étot fini, ch'étot comme deux copains
A eusses deux i z'alleutent'è faire el l'ong quémin
Du glichache à l' bowette, pour aller au carbon
All' prenot bien soin d' li pour qui rinte à s' mason
Quand nou mineur i s'assiot pour minger sin briquet
All'étot à sin posse pou pouvoir l' éclairer
Pindue après un bos ch' étot cha sin repos
All' le faijot d' bon coeur cha ch'étot sin boulot
Et pis un bieau matin in n'i' a donné s' pinsion
Car nous mineurs à ch' teur, i z'ont un aute lampion
Mais in lé veyant là tou seu à coté d'mi
Pour mes brafes gins du fond, ji dis un grand merci
Isaïe LAMPIN ( 1927 - 2007 )
Poète patoisant de Souchez, ancien mineur.