histoires-de-chtis® depuis le 20 février 2005

 

 

Les 60 dernières histoires


  souvenirs douloureux (17/09/2017)
  ch' rabattu et la buée (17/09/2017)
  hatari (17/09/2017)
  El centre aéré géant de Bruay (11/09/2017)
  Bruay, El pont ferroviaire d'Lavolville (11/09/2017)
  Eune consultation al' champe (11/09/2017)
  Eric Denudt artiste peintre un gros coup de coeur (11/09/2017)
  que j auro ker avoir eune chiffernée (10/09/2017)
  Merlimont hors saison 17 (07/09/2017)
  souvenirs d' rintrées (04/09/2017)
  eune pensée pour eusses (03/09/2017)
  à la recherche de nos taïons (28/08/2017)
  Marles-les-Mines, el station SNCF (18/08/2017)
  Vermelles, le nom de la Cité du Philosophe (13/08/2017)
  Merlimont hors saison 16 (13/08/2017)
  collection de poupées (04/08/2017)
  Merlimont hors saison 15 (31/07/2017)
  Auguste Labouret (27/07/2017)
  au coin d' la rue de Périgueux et et de Grenoble (26/07/2017)
  du bout des léves .... (26/07/2017)
  Tour de France (23/07/2017)
  cha vient de Naxos (22/07/2017)
  Première descente (16/07/2017)
  la croix de grès de Divion (10/07/2017)
  attintion aux courants d air (06/07/2017)
  Merlimont hors saison 14 (05/07/2017)
  gai gai l écolier (04/07/2017)
  Merlimont hors saison 13 (03/07/2017)
  Merlimont hors saison 12 (02/07/2017)
  Merlimont hors saison 11 (02/07/2017)
  Merlimont hors saison 10 (02/07/2017)
  Merlimont hors saison 9 (01/07/2017)
  Merlimont hors saison 8 (01/07/2017)
  Bruay et el batalle du carbon (27/06/2017)
  Merlimont hors saison 7 (18/06/2017)
  Merlimont infinqué (11/06/2017)
  La mairie de Bruay en feu (08/06/2017)
  Merlimont hors saison 6 (06/06/2017)
  Merlimont hors saison 5 (05/06/2017)
  Merlimont hors saison 4 (04/06/2017)
  Merlimont hors saison 3 (04/06/2017)
  fête des mères (28/05/2017)
  Flameng, Vimy, Ravel, Cendrars (25/05/2017)
  décès de Monsieur Joseph Malecki (23/05/2017)
  cha tourne à toute blinte (20/05/2017)
  j y a cru (20/05/2017)
  ah l' bon gout d' la levure (18/05/2017)
  souvenir du vélodrome de La Buissière (16/05/2017)
  Merlimont hors saison 2 (14/05/2017)
  j' fais m' b a (14/05/2017)
  Merlimont hors saison 1 (13/05/2017)
  Merlimont hors saison (10/05/2017)
  barraqu'mint près de la rue de maubeuge (07/05/2017)
  pas comme ché belches (06/05/2017)
  mais commint qui fait ? (02/05/2017)
  1978 drole d' caricature (01/05/2017)
  les élections présidentielles (29/04/2017)
  ch'est pas pour les éfants (28/04/2017)
  rin qu à l odeur (25/04/2017)
  vous zin prindez bin eune tranche (24/04/2017)

Vos histoires


Proposer un article

Livre d'or


Ecrire dans le livre d'or
Lire les messages du livre d'or

Derniers messages :


 clarinette61 ( 09/09/2017)
Bonjour à tous Fill...
 Mégane ( 08/09/2017)
Bonjour, Habitant ...
 FRYHTAN ( 30/06/2017)
Bonjour à toutes et ...
 Pascalou ( 25/06/2017)
Bonjour à tous, je v...
 Greyg ( 15/05/2017)
Bonjour à tous, Je ...


Liens
Histoires de chtis sur votre site
début d' nouvelle année suite
par minloute le, 01/01/2011  

mais dins ché gardins in peut pas in planter plusieurs d' sapins, donc min père i acato des sapins au pied coupé, chéto d' ailleurs toute eune organisation pour coincher ch' pied quand qu in l' metto in plache , dans eune espece d' trépied du qui fallo serrer tro boilons tout in ravisant pour qui reste bin dro durant ch't opération

j' avo pas trop ker et' là quand qui fallo faire cha, pasque j éto alors préposé au tiendache du sapin dro et j avo qu eune frousse , que min père qui avo du mau à s arléver aprés avoir serré ché boulons dins l' pied du sapin,(faut dire qui avo eune gampe raite) i vo que ch' sapin i soit pas dro as' mote ...ché pour cha que chéto eune opération espéciale mobilisant tro personnes
min père incrinqué sous ch' sapin qui visso ché boulons sul' tiche du sapin, mi qui t'no l' sapin l' plus dro possipe, et m' mère in peu en arcul qui , comme ché géometes , raviso à c'que j'reste bin dro durant l' serrache du pied

opération délicate, ponctuée de la part d' min père par des "MEEERTE" ou "Ché dro Odette?" "t es sure" , et m' mère qu ale répondo par "pour mi ouais" , c' qui avo l'don d énerver min père , et qui rajoutto " alors ché dro ou pas dro ?" et m' mère au bout d'tro quate fos, ale oso dire tout douch'mint "j' cro qu' ché bon" , mi , dins ché cas là, j' me faijo invisipe , et si min père quand qui s arlevo chéto pas dro pour li, alors là in avo dro al' sérénate..."ché pourtant pas compliqué d' tenir un sapin dro", mais ché surtout à m' mère qui faijo d'zarproches, mais i s arreto aussi vite qui avo comminché , dés que m'mère ale brayo, et comme ale éto sensipe, cha faijo que ses ingueulates ale durotent te pas longtimps, pasque si m' mère ale brayo, min père i savo pu du s' mette et i éto géné à in braire li meme in prennant m' mère dins ses bras in essayant d' raccomoder tout cha sul' ton d' la plaisanterie .......

cha y est, va falloir s' lever, j intinds min père qui est in train d ayonner ch' premier convecteur , chti qui est dans l' pieche juste in d' sous d' mi, aprés i va faire ch' convecteur del pieche d' devant

que boucan cha fait , i ayonne l' grille qui a à l interieur avec un outil qui s' finisso en crochet d un coté, et qui accrocho à eune des manettes qui yavo in d'sous du radiateur , et en avant j' ayonne

poussieres et boucan garantie..mi j' déchindo , en faijant attintion d' pas croiser min père qui ach' momint là, opération délicate , allo vider dinch' gardin les chintes éteintes d' ché 2 convecteurs ...

quand que j éto tchiot , j avo dro au meme rituel l' matin du premier jour d' l année
d'abord j avo dro à gouter à eune tasse de café, bin i m a fallu du temps pour in boire, et meme asteure al' mason , jamais j' pinse à in faire ,chéto un peu comme si l' fait d' passer à la nouvelle année, j allo d'venir un "grand" et pour cha fallo faire comme eux, boire du café ...

aprés, j avo dro à un tchiot cadeau, oh y éto pas imballé dans du papier cadeau, i éto dans un tchiot sac en papier , chéto le "coffret du fumeur" , un truc à faire dresser ché caveux à tout ministe d' la santé actuel ......

l' coffret du fumeur, chéto dans un blister en plastique, in y artrouvo : eune pipe in plastique, 2 boites d' paquets d' cigarettes , in chocolat j' précisse, un faux briquet in plastique, pi eune fausse boite d' toubaque, avec à l intérieur du chocolat...

j' do préciser que ch' chocolat y éto pas formidape, faut dire qui avo séjourné dins zin sachet plastique, et que ch' gout i avo rin à vire avec ch' chocolat qu in acato d' habitute
pour rappel, in chocolat in trouvo alors 3 grantes sortes d' chocolat, chti avec un emballache type kraft, chtilale chéto plutot pour l' cuisine, aprés yavo l' chocolat qu in acato à la Coop, le chocolat Coop, emballage bleu ou rouche , plaquettes fines , avec un dessin su chaque carré, cha arprésento les rayons du solel couchant et bin sur le chocolat "haut de gamme" le chocolat Cote d' OR .......

mais in avo pas trop l' temps d' trainer , fallo aprés printe sin tour pour aller s' laver, m' mère ale faijo alors les dernieres préparations pour l' repas ché mamatante, ale sorto ché grands plats guidegrenne in inosque, et ale faijo ché plateaux de crudités, qu ale imballo aprés avec eune espéce d' film plastique pour ch' transport
min père durant ch' temps là i préparo ché dernieres bouteles d' vin à im'ner
i mettotent insuite ché cadiaux à offrir dins l' carette, i s' rapurotent chinq mineutes
c' qui permetto am' mère d' m ingueuler in m' disant que j'éto djà noir comme un pot alors que l' journée ale éto pas cor comminchée ...
ensuite i éto onze heures et d' mie, eh ouais cha passe vite tout cha, là mes parints i mettotent ché plats d' crudités, ché bouteles d' dins l' coffe, pi pour terminer l' tout, placher à coté d' mi sul' banquette arriere, l' boite à chocolat pour m' grand mère, et ch' pot d' fleur qu in allo offrir à mamatante, et que j éto chargé d' tenir in position verticale durant tout ch' voyache in carette

voilà j' vo pu grand cosse à vous dire , in est in train des' garer in face del mason à ma matante, y a djà pas mal d' carettes ..
j' vous laisse pasque mes parints i sont in train d' sortir tout c' qui zavotent mis dins l' carette et mi j' fais ch' portier, in arfermant ché portieres, in ouvrant ch' portal pour acceder al' mason
cor quequ' marches, j' va sonner , chéto min plaiji, pas attinte qu in réponte à l intérieur, rintrer dinch' brouhaha, et commincher l' fricassée d' musiaux ...

comme ché eune opération délicate, bin dire sin "bonne année , bonne santé" et attinte que ch' billet i quette dins m' main eune paire d' coups , j' su obligé d' vous laisser , cha m' permet d' vous souhaiter cor un coup , eune bonne année 2011

par fjm le, 02/01/2011

Chez un bo tiot romin qu't'ai nous à fait la minloute.
Chez un' belle histoire, comme diro Michel Fugain.
Ech' sapin à mette dro pis qui tompe pas un heure après, et ch'kit et fumeur, el pipe in plastique et ch'toubac in mauvais chocolat, j'cro qu'un à tout eu l'même.
Chez bonne année pis surtout in bonne santé din l'famile, à chez voisins pis tout ceux qu'in croiso.
Chez "Mon oncl'! ... ma tant ! ..." quand un arrivo.
Cha rappelle cor des souvenirs tout cha.
Ch'repas avec el tarte à libouli al fin.
Em tante ed Noeux-les-Mines al faiso chelle avec chez plus gros bords qu'javo jamais vu !
Core merci pour t'in récit, et core un coup:
Bonne année! ... Et surtout un' bonne santé ;-)


 


Contact | ©2005 histoires-de-chtis®.com - Webmaster : Gold77 - CNIL : 1075910 - 25 visiteurs connectés - Qui est connecté ? |