l'temps des jacinthes

début d' année, chéto à nous à déchinte à mon d' chez Clara , ale habito rue Florent Evrart sur la gauche quand qu on v'no du pont du 2
s' mason in l vo pu , pasqu ale a été "ingloutie" par eune nouvelle construction
chéto à l époque , l' plus tchiot log'mint des zouillères d' bruay mes gins, eune pieche in bas avec eune pieche à l étache , mais basse d' plafond, au rez de chaussée, aprés l' pieche principale, t avo eune "cuisine salle à minger" , plus longue que larche, aprés té sorto dehors yavo quequ' barraques , refuges d' ché cats, et aut' particularité , pour aller dins sin gardin, fallo monter un paquet d' marche dins s' tchiote cour pour y acceder ...

ché vous dire que ché rayons du solel i rintrotent pas bin longtimps dins s' cuisine ,du qu ale passo un bon momint d' son timps, quand qu ale éto pas par monts et par vaux à l' extérieur ....
j' vous dijo que s' mason ale avo été "ingloutie" , ché qu eune fo arvindue , i zont mis par dessus ché murs extérieurs eune deuxieme rangée d' briques plus récentes

ché bin simpe, pour ché plus curieux, déchindez l' rue florent evrard, zallez vire sur vot' gauche , 2 masons individuelles assez récentes, bin ale est juste aprés ..

comme d' habitute , j' pousse un grand soupir, j' suis cor parti par chi par là, alors que j' dijo , au début, qu in allo , nous aussi étrenner Clara , à not' tour l' semaine aprés ché fetes

et pourtant Clara ale avo passé l' journée du nouvel an al' mason , minger avec nouzautes, mais , chéto l' tradition ou l habitute, enfin chez nous, d' faire la tournée del' famile au tout début d' l année pour offrir eune jacinthe
mi j avo ker cha , pasque offrir un pot avec eune seule jacinthe, zallez dire ché mesquin

nan pas du tout, eune seule jacinthe , cha vous imbaumo l'pieche durant plus d eune semaine

yavo différents coloris , in avo acaté cha au marché et j' me souviens que chéto mi qui choisisso ché cache pots d' couleur

vous vous souv'nez d' cha ? ché caches pots d' couleur ? chéto soit in papier soit in plastique, chéto tout serré et tel' metto autour du pot in terre cuite et cha prenno la forme , chéto comme tout plié , j avo ker cha , d ' ailleurs j avo ker in récupérer 2 , que j' metto aprés à mes poignées et cha faijo comme ché gants des comboyes

in éto toudis bin accueilli chez Clara, mais savez, vous y alliez pour li donner eune fleur, ale vous in ardonno eune aute, pi un kilo d' oranches ou d' pommes, eune boite d' chocolats , des cigarettes , des gatiaux ....sin buffet à Clara , chéto eune épicerie à elle toute seule ...

à la fin des' vie ,j a plutot un souv'nir douloureux ,in allo l' vire quand qu on armonto à bruay , in allo li souhaiter un "joyeux noel" et eune bonne année , ale éto placée rédidence des flandres j' cro bin, ale avo perdu les pédales , confondant tout l' monte et ale attindo qu eune chosse , chéto d' partir

c' qui m inpeche pas 15 ans aprés sin décés , d' vous in faire l' portrait, et que j' teno in chte début d année à l' armette in peu "en valeur"