in arrivant à merlimont

cha faijo eune demie heure qu on éto arrivé à merlimont , rassurez vous j' m éto djà fait ingueuler eune bonne dizaine d' coups par mes parints ..
mais ché pas d' em' faute mes gins, EUX , i sont in train d' ranger ché zaffaires d' accord, mais MI, j' m innuie...

Après l' euphorie d' aller m' dégourdir les gampes derriere l' mason, mi j auro bin voulu qu' in m' ouve tout d' suite l' porte del barraque, pour que j' puisse artrouver mes juets d' l année derniere
"ch'j' géno", "taleure" , "attinds" ," in a aut' cosse à faire", pi quand que j' veno trop souvint les vire dins l' barraque , chéto m' mère qui diso " ravisse tout l' sape qu' t a djà rintré ichi avec tes sandalettes, chéto cor prope y a chinq mineutes " ..
j' connaisso la suite, j' savo que l' ouragan i allo arriver, j' prenno mes distances, j' avo gardé l' main sul' poignée d'el porte, que "je devo bin sur arreter d ayonner" , que " j allo l' casser , qu' j allo dire que chéto pas dem ' faute "...

mi j attindo pas la fin du "sermon" , j artourno dehors, mais j' savo qu' min père i allo bientot ouvrer l' barraque in bo qui éto dérriere l' chalet

chte barraque , chéto mon mononque qui l avo récupéré , ale avo eune paire d années déjà, chéto eune barraque d' cantonniers des ch'mins d' fer ..
mi j' la toudis connu couleur vert délavé, ale éto pu d' premiere jeunesse mais là, à l abri du mur del mason, ale a ouvré cor eune paire d' décénnies, ale a abdiquée pour tout vous dire, les armes à la main, que l' jour qu' min père i s a fait construire eune barraque avec des panneaux en béton, savez comme pour ché maisons phoenix , bin chéto l' meme sorte ...
à peine qu' min père i avo ouvré avec bin des difficultés ch' cad'nas , (chtilale i aura droit à un badigeonnache espécial d' huile ou d' graisse pour qui fonctionne normal' mint)
comme i dijo min père "chtilale (i parlo du cad'nas) que fate, in li d'minte d' s'ouvrir tro ou quat' coups par an , et i fait cor s' n interessant"

faut dire que tout l' temps qu in séjourno à Merlimont , l' barraque ale éto simplement freumée mais pas cad'nassée , d' ailleurs ale resto souvint ouverte, l' porte accrochée à eune des cloisons in bo par un systeme ingénieux, eune espece d' ressort fait avec un boyau d' roue d' cycliste

bon là j' me faijo cor ingueuler pasque j' voulo tout d' suite artrouver min pistolet d' l année derniere, mais que là, comme d' habitute , "j' géno"
bin ouais au lieu d' m' ouvrer tout d' suite l' barraque pour que j' artrouffe mes juets, ouais faut dire que l' rang'mint et mi cha fait deusse, nan, j' commincho à cacher mes pistolets quand qu' min père i ram'no ses bouteles d' vin, ses cartons d' bouteles d' pinard , cartons qui servotent à am'ner eune paire d outils pour pouvoir bricoler un tchiot peu , pasque y a toudis quéquosse à réparer ou à entrenir dans eune mason souvint innocupée et cor plus soumisse aux zintempéries d' la mer et d'ses embruns ...
mais min père i m in voulo pas d'et' chiant, pasqu i éto as n aise , i éto à Merlimont ...m' mère moins ...ché l' moins qu on puisse dire, m' mère et la mer , cha faijo deux ... mais bon , pour ché zinfants ale éto continte quand meme

j' éto contint d' fouiller à nouveau dins l' barraque, j artrouvo meme des juets que j' pinso pu, j' faijo quand meme attention pasque comme j' vous a dis l' mason , tout comme l' barraque in éto pas les habitants les plus fidèles et chéto les araignées qui squatotent l' barraque , et mi les araignées cha faijo deux à ch' momint là ...

j' artrouvo mes seaux , mes pelles , bon in gardo sin mantiau sur soi quand meme, pasque in dehors du 15 juillet au 15 aout, en artirant les jours d' pleuffe qui pouvo y avoir aussi, chéto rare qu in soit in nache à merlimont, cor moins al' périote d' paques ...........

cha y est j avo artrouvé min pistolet, eune ceinture pour l' attacher à min coté, et ché ach' momint là que j' commincho à bien juer , qu' min père i dijo qu in parto à la mer
vlà, ichi partagé entre la joie d' juer enfin ichi ou d aller à la mer, bon j' jetto vite fait mes juets, qu' min pere i me d'mindo d' ringer, que j' jetto in vrac dins l' barraque, tout cha pour aller voir la mer d' près ....