digressions autour dech' lapin

j' vous a prév'nu dinch' titre, cha va et' "digressions " autour dech lapin

zallez dire des digressions, t arrete te pas d in faire quand que t écrit, té part d un sujet , té va t égarer pour arvenir à la fin au sujet principal
j' va donc pas canger ché régles, mais vous préciser que ch' lapin cha va et' quand meme l' fil conducteur du sujet

faut un minimum quand meme ...

mon diu, n' me d'mindez pas d' tuer un lapin, j' s'ro pas faire, comme j' dis am' femme, j'arriv'ro sans probleme d' te faire passer d' vie à trépas, que j' pourros pas l' faire pour eune biete ...
cha la rassure pas savez, mais ché comme cha que j' maintiens m' n autorité sur elle depuis plus d' 24 ans ...
là , elle est roulée in boule dins sin panier , à mes pieds

cha vous fait réver hein ? mais ché un dressache d' tous les jours cha, des zheures et des zheures d' traval ......

pour in arvenir ach' lapin, m' mère ale avo ker les betes , et al' n avo contre s' mère , et ale li rappelo quequ' fos, quand que chéto elle quand qu ale éto adolescente, que chéto elle qui devo tuer ché lapins avant qu in les prépare pour les minger

d' ailleurs chéto simpe, m' grand mère ale v'no minger tous les diminches al' mason

j' a toudis connu cha, au début al' v'no à pied, chéto pas loin, à peine 100 m, pi aprés min père y a été l' querre in carette , cor plus aprés quand que ma matante , sainte femme, qui a gardé s' mère toute s' vie avec eux, ale a déménagé à l' bussiere

inter m' mère et s' mère, yavo quequ' fos d' zétincelles, et mère , autant in pouvo l' qualifier d' réservée, autant avec s' mère , pour eune reflexion, un avis différint sur l' famile, cha parto au quart d' tour

savez ché histoires d éducation, cha fait babeller, cha délie ché langues, et ché souvint fouteux d' brin dans eune famile
et zallez dire quo ché qu' cha a voir avec ch' lapin ? ché qu à chaque coup , y avo l' meme litanie "oh té sait , té peux parler d éducation, quand que ché nous qui devottent aller faire ché courses et qu' té resto al' mason", ou alors, "ah fallo toudis que j' survele Marthe (s' soeur)" et à chaque fo in avo dro à l histoire du mantiau que Marthe ale avo oublié à l école et que ché m' mère qui a du aller l arquerre à l école , qu in plus que Marthe ale avo dit que grante soeur ale la tapo ........

ché pas trop que s' soeur ale ait dit cha qui faijo cor ruminer m' mère bin d'zannées aprés, chéto plutot l'manque d' réaction d' ma grand mère

et bin sur in arrivo à l histoire d' ché lapins qu' eume grand mère ale élevo et que chéto à Odette, m' mère,adolescente guerriere s il en est une .....qui devo tuer ch' lapin quite à s y arprinte à plusieurs coups ....

l' réponse d' em grand mère chéto toudis la meme " j' éto seule al' maison, Georches (sin mari ) i éto pu là"
Et m' mère d' armette eune couche " mais cha t impécho pas del' faire" et m' grand mère ale répondo " mais j avo pas ker cha" et m' mère "bin ché pour cha que té mé l' fait faire" ...

chéto pour mi comme des répliques fétiches d' cinéma, j' les connaisso par coeur ...
quand que j' voyo que l' sujet i parto là d' sus, j' observo chacun avincher ché pions, quoi que , quand que té ravisse eune partie d' échecs ou de dames, ché pas forchémint la meme partie qui juent à chaque coup, tandis qu ichi , chéto réglé comme du papier à musique , j attindo patiemmint que cha arriffe sul' sujet du lapin, et pif paf, ché répliques ale fuzottent , à min plus grand bonheur

par conte pour apprécier cha as' juste valeur, fallo garder un visache sans réaction, fallo pas sourire, sinan m' grand mère am' linço ses zeules noirs
pi si j' m éto moqué d' em'grand mère, et ché là toutes ché subtilités qu in peut pas comprinte quand qu on est tchiot, ché qu ach' momint là, m' mère au lieu d' em ' féliciter ou d' m incourager, ale m' dijo d' em' taire, et là d un seul coup ,' j ' artrouvo seul contre l alliance arformée d'em' mère et d' em grand mère

et min père dins tout cha ? ah savez, ché joutes inter mère et file, chéto à tape que cha s' déroulo, eune fo ch' café bu, et min père ach' momint là i s isolo d' tout cha, in s' camuchant derriere sin journal, in éto arplié dins l' salon ...

pour rester dans l' sujet du lapin, quand qu in in faijo al' mason l' dimanche et que m' grand mère ale éto là , chéto parel , l' meme rituel que j' va vous décrire

quand que m' grand mère ale rintro al' mason , ale d'mindo toudis "quo qu in minche à midi" et si chéto lapin, ale s artourno vers mon père et ale li dijo "Léonce vous m avez gardé l' tiete ?"

ouais pasque quand que m' mère ale ram'no ch' lapin al' mason, et cor , j' vous parle d un lapin dépiauté, et vidé,fallo que cha so min père qui le prépare

séquelle d un traumatisse d infance cha, quand que min père i coupo l' bout d' ché pattes du que ch' boucher i avo laissé eune touffe d' poils à chaqueune , m' mère ale dijo" oh j' pourro pas faire cha"

mais ché pas tout, quand qui fallo mette ché morciaux dins l' faitout, ale faijo cha d un air dégoutté, et que dire pour l' tiete, comme dijo Louis de PEUPLINGUES dins zin d' ses sketches, si allo pu met' eune rallonche d' vint mete al' cuillère ale l auro fait

ale pouvo pas met' l' tiete, pasque ch' lapin i l a raviso du coin des' n eule ......véridique mes gins .....

alors ale allo querre ch' faitout , alors là zaurotent vu m' grand mère, ale avo arpris un mete , l' cou dréché , l'tiete in avant , presque dins l' gamelle

là yavo contraste , m' mère ale cacho l' tiete d' lapin dins ch' faitout, d un air que si ale éto in train d' vider ché cabinets, et d' l' aute m' grand mère , serviette coinchée dans l incolure des' rope ,l' eule pétillant d' plaiji à l avinche , qui tindo s' n' assiette pour et' servi in premier ........

alors là , premiere vérification , fallo qui a ché zeules, souvint ale le d'mindo am' mère " ya cor ché zeules ? " et m' mère qui li répondo du tac au tac, "té verra bin eune fo dint' n assiette" ......

et là m' grand mère ale commincho par piquer ché zeules et les minger, aprés chéto que décortiquache, as' pourlequer les babines

mi dins ch' lapin, ché comme avec m'femme , mi j a ker la cuisse , et d' vire m' grand mere, s escrimer avec l' tiete , cha m étonno grinmint , et j' me dijo que chéto des plaijis du temps passé ..........

et m'mère zallez dire quel morciau qu ale avo ker dech lapin ? bin aucun, cha allo meme qu ale in mingeo pas du tout
ale s' servo eune tranche d' jambon , ah zallez dire du jambon , in voyant cha comme asteur dins s' n emballache plastique ...

nan , nan mes gins, y a un temps, pas si lointain qu' cha, que le jambon chéto toudis bon, pasque qu in l acato à mon dech' boucher charcutier
chéto pas un plat d' raccroc comme asteure, nan chéto eune viante comme eune aute

et pour terminer avec ch' lapin, m' mère qu ale avo pas ker cht' animal là, ale nous préparo quand meme des sacrés patés d' lapin, mais des patés du qu in garte les oches dech' lapin
cha , fro, avec des frites et eune biere , à genoux les pitits zinfants ..............

pour information , y a eune confrérie du coté d Arras, eune confrérie des mingeux d' paté d' lapin avec oche

Jé n'résiste pas à vous armette l'arcette du paté d'lapin avec les oches ! comme mi jé l'fais toudis , et comme dit minloute un paté d'lapin avec des frites et eune bière ché un régal
Jé n'sauros pas non plus tuer un lapin, à mason in n'élevot et chétot min père qui l'féjot
par conte ej mets el tête si y a core del plache dins l'paté mais ale finit quand même al poubelle après ... et faut dire que j'a un peu d'ma à l'couper aussi , j'coupe in ravisant ed coté d'un air un peu dégouté ...

L'arcette du paté de lapin