début d année scolaire

début d' année scolaire, premier jeudi de repos.... ché là qu in allo à mon d' chez Madame Vangelder ch' commerce qui éto rue anatole france , juste avant l' framacie ....

tchiot , j' me souviens que j éto toudis très sache quand qu on allo dins sin magasin avec m' mère
tout cha pasqu ale m avo expliqué c' qui avo d' marqué sul' plaque sul' coté del mason
cha expliquo que chéto dans chte mason que Mr Vangelder i avo été tué par ché zal'mands quand qui sont partis en septempe 1944......

j' comprenno pas pourquoi d ailleurs Madame Vangelder ale nous accueillo avec un grand sourire et eune vo toute douce alors qu' sin homme i avo été tué par ché zal'mands des années avant ......

rin d' l extérieur , ou in tout cas j a pas l' souv'nir y rin qui signalo que chéto un magasin à l intérieur ...

ch' magasin y éto situé entre l' épicerie NEN et l' framacie .......
j' me souviens d ailleurs pas bin dans l' détal quo qu in y vindo à part les fournitures scolaires
j' me souviens qui y avo un carillon et que dés qu in rintro chal' bousculo et y avo un son vraimint agréape ....

j' me souviens que chéto assez sombre, qu au sol chéto du parquet in bo bin ciré, et qui yavo eune grante tape au miyeu et que d'sus y avo des cahiers et des fournitures d' classe

ché là que m' mère ale allo acater d' quo arcouvrir ché lives et ché cahiers ....

pour ché cahiers, in acato des proteges cahiers in plastique, alors i fallo in acater un en rouche, un en vert, un aute en bleu et un aute en jaune , ch' maite li , par l intermédiaire d' l école i fournisso ch' protege cahier qui servo pour l' cahier d' composition, j' me souviens cor del couleur , i éto marron foncé ....

par conte in cours d année fallo pas s amuser , si t abimo tin protege cahier jaune , d' mette eune aute couleur, et pire mi un coup j avo mis un protege cahier à motifs, "léger'mint " bariolé
j' me souviens que ch'maite i avo mis un mot in dijant qui éto pas pour la "fantaisie" ...........

mais pour mi , c' qui m intéresso pas, chéto eune histoire d'manman, ché quand qu ale acato ch' papier pour arcouvrir ché liffes ...

là parel, i éto pas question d' "fantaisie", cha dépindo des maitres ou des zannées, mais à l' école Loubet, in primaire, j' me souviens que ch' papier qui arcouvro ché liffes i éto soit en papier et aspect kraft , et eune année cha a été papier kraft mais i fallo qui so d' couleur bleu foncé, t as qu à vire

chéto m' mère qui éto chargée d' cha, eune fo rintrée d' à mon chez Madame Vangelder .........

ale sorto tous ché liffes d' mon cartape, pi j' la voyo découper sans hésiter dans ch' rouleau , la longueur d' papier qui s' ro necessaire pour arcouvrer ch' liffe , l arplier, pouvoir met' du ruban adhésif (j auro pu dire du scotch, pasqu in utiliso pratiqu'mint que chtilale)pour tenir ché rabats ...
eune fos l opération terminée, ale collo d' sus l étiquette du que ch' maite i avo marqué min nom et min prenom et l' matiere dudit livre , tout cha avec eune belle écriture "ampoulée" qu in pourro dire

bin sur, m' mère , aprés chaque liffe , am' dijo, "té fra attintion hein à pas l abimer" mi j y répondo toudis " bin ouais m'man"
c' qui m impécho pas des histoires extraordinaires qui m arrivotent , mettent in causse des voisins d' classe , qui zavotent fait querre min liffe au sol et que cha avo déchiré l' couverture kraft ........

ché seul'mint en sixieme, que là tout y a cangé, adieu ché encriers au coin des pupitres, fini ché porte pleumes , bonjour le stylo bille adieu ché proteche livres in papier kraft, vive les protèges livres in plastique transparent ......

au fait ,l' plaque commémorative qui concerno Mr Emile Vanghelder, ale a été démontée, et armise avec les zautes au mur du souvenir au cimetiere du 3 à bruay

j'ai souri en lisant que minloute se demandait pourquoi la commerçante avait encore le "courage" de sourire aprés ce qui c'était passé dans sa maison ...c'est beau d'etre enfant

minloute t'as l'air ed connaitre l'école loubet est ce que té peux m'rinseigner, pasque quand j'étos in 6éme din l'classe au dessus dech tableau y avo eine plaque commémorative ed monsieur kermarec ech l'instituteur del classe qui avo été fusillé. té pététe trop jone elle avo pététe été inlevée à t'n'époque mais si y a quelqu'un qui s'in souvient?

Bersil, té parles de 6ème à Loubet, l'6ème ch'étot dins ch'batiment ed gauche pas dins chti du fond?
I avot M. Wacheux, M. Houillez, M. Lefevre et un aut'; i avot 4 classes dins ch'bâtiment là.
T'as été aussi à l'école Loubet alors? dû qu'ch'est qu'té restos?

j'ai habité un momint din l'rue leverrier el 6éme chéto bin ech batimin à gauche ou y avo 4 classes, y avo mr Legrand qui éto sévère esse femme elle éto institutrice ches les filles, y avo mr Bourdon qui habito din l'école in allo démarier ché carottes din sin gardin, mr Lefebvre souvient plus du quatrième chéto in 1945 46, au fond din ech rinfoncemint y avo Mr Dussard qui habito aussi din l'école ché vieu tout cha