ch' pain
par minloute le, 28/02/2011in a connu ch' pain coupé al' mason, quand qui yavo l' boulangerie Mouton qu ale s éto installée à coté d' chez les soeurs Balavoine et d' Madame Maréchal qui avo pris l' relais
Ch' boulanger , Monsieur Mouton, i éto pas du coin, i éto arrivé avec des idées nouvelles, i avo d ailleurs arfait l' devanture complete du magasin, à l intérieur chéto spacieux, moderne, chéto eune tomette rouge au sol
m' soeur ale y avo travaillé un momint si j' min souviens bin, d' toute fachon toute "pisse vinaique" qu ale est (j' parle dem' viele soeur impotente ) , am' confirmera cha j' su pas inquiet .......
y a pas resté longtimps ouvert , am' mote tro quate ans, aprés y a été rimplaché par Monsieur Leroy qui teno djà un magasin d' légueumes d coté du dispensaire d' la belle au bois
Monsieur Leroy, Madame Leroy et bin sur s' n ' employée Monique , que certain d' aute qui vient sul' site y a bin connu aussi, et qu in a les memes sentimints d' tristesse quand qu in parle d' elle...mais ché un aut' sujet
avant donc chéto des grands pains qu in acato, chéto un rituel avant d' commincher à minger, m' mère ale donno ch' grand pain et ch' coutiau à min père
i coincho ch' pain sous sin bras, i li faijo un sine d' croix avec sin coutiau sul' dessous dech' pain, pi i coupo les tranches
chéto un momint solennel, min père i rigolo pas quand qui faijo cha, comme si chéto un peu li , ch'chef d' famile qui bénisso l' pain, pour qu in l' minche aprés
d' ailleurs ch' pain chéto sacré, t avo pas interet à juer avec, al' faire querre à terre , et j' parle pas si té commincho à rouler la mie sous tes dogts
d' ailleurs cha m a resté, cha m' fro presque degueuler quand que j' fais cha
eune d' mes files ale avo un copain qui faijo cha à tape, tout copain qui yéto , i la pas fait deux coups, et y a eu dro al' phrasse habituelle "in' na qui minchent pas à leu faim, in jue pas avec l' pain"
mi quand que j armonto dinch' nord, j a do ro ch' pain coupé, j ' pouvo in minger la valeur d un demi pain coupé avant , pendant, et aprés l' entrée, tout in attindant ch' plat principal
et j' vous dis pas que j' avo ker i rajouter du beurre, du beurre mou, que m ' mère ale metto dins le haut du buffet ,porte d' droite dins zin beurrier in inosque
d' ailleurs quand que m' mère ale allo a mon del boulangerie , et que ch' gars i voyo qu ale preno nan pu un pain coupé , mais 3 , i li dijo "ah ,ch' parisien y va arriver" ...
vla commint qu in éto catalogué ...
bin sur avant ch'pain yétot pas copé et chétot des pains ed' 3 lifs , et quand ché mi qu'yallot l'querre cha sintot ch'pain grammint plus qu'ach'teur et yetot tout caud , quand j'rintros , j'avos mingé ch'cul et pi après yavot un tros din l'mie , assez important , j'savot c'qui m'attindot , cha n'm'impéchot pas d'arcommincher