l' enchanteur Merlin
par minloute le, 08/03/2011 ché plus jones i vont dire, cha y est minloute i va nous raconter s' ninfance, et comme i comminche à vieillir , cha devo et' du temps des mythes et des légendes , du temps d' l enchanteur Merlin ..
bin avec vos moqu'ries zetes pas si loin qu' cha d' la vérité...
mi j habito Bruay , rue Anatole France, l' grante rue qu in appelo dins l' temps "rue impériale" et aprés "rue nationale" , pi Anatole France
d' ailleurs eune tchiote disgression, l' nompe d' rues in France qui s appellent Anatole France ... chéto à l époque un écrivain fort connu, fort apprécié mais qui est tombé asteure un peu beaucoup meme, dins ché zoubliettes ...
donc nous quand qu in éto tchiot et qu in déchindo aux "quatechemin", (i m a fallu in momint pour comprinte que cha voulo dire "quatre chemins), ch' carrefour que té peux aller à droite vers Haillicourt et ch' terril du 2 bis , à gauche vers la Belle au Bois, La Volville, pi Marles, et in face t allo vers le state d' Labuissiere , Hesdigneul, Béthune
su la gauche yavo dins l' temps, le plus pitit magasin Leroy Merlin qui a existé in France y avo ouvert là en 1959 ......
yavo déjà Noeux , Merlimont , pi Longueau comme magasins
y avo djà eu eune évolution, pasque l' société cha s appelo , ché anciens i s in souviennent cor , j' pinse à des "dinosaures" comme Maurice, qui a tel' mint longtimps qui sont là, qu in fait in a construit ché fosses autour d' leurs berceaux ....tout cha pour vous dire que cha s appelo avant "Au Stock Américain"
et qu au départ chéto bin un Monsieur Leroy et eune Madame Merlin qui étotent à l origine d la société
chéto au temps du que l enseigne chéto pas un triangue vert , chéto du temps que la société ale apparteno cor al' famile Leroy , et l' symbole d' la société, (cha a bin évolué aprés), chéto eune espece d' lutin ...
et j' me souviens que quand qu in passo d'vant ch' magasin l' enseigne al' clignoto bleue, vous dire qu asteure cha paraitro bien désuet tout cha, mais à l époque cha paraisso ultra moderne .....
chéto pour nous des magasins d appoint, l' bricolache i avo pas cor pris l' plache qui avo asteure , pi yavo des rayons qui marchotent plus qu' les zautes
in fait chéto vraimint l' papier peint, les meubles,ché rideaux, in fait l' décoration intérieure d' la maison qui marcho fort , in dehors d' l activité d' construction des masons et des chalets "heureux comme un roi dans un chalet leroy"
l' bricolache par li meme, chéto pas si développé qu' cha, faut dire aussi que chéto un temps du que ché gardes i tournotent dins les cités ,et que t avo pas interet à faire des transformations , des constructions sans avoir leur accord
(j' dis pas que ché cabanes fallo eune permission, chéto toléré, et meme au début chéto encouragé par ché compagnies qui s'dizottent que tant que l' mineur i s occupo à sin gardin, i allo pas au bistrot et y pinso moins à discuter du bout qui va d' vant ...)
ché vrai aussi que ché mineurs i zutilisotent pas mal d' matériel d' récupération, mais aussi que tout douch'mint des magasins comme Leroy Merlin cha a comminché à toucher d' plus en plus d' clientèle .....
pi l' magasin d' Noeux cha a pris eune sacrée expension, j' vous in parlerais un aut' coup , et à la fin , vers l' milieu des années 80, ch' magasin d' Labuissiere y a pu été rentape
vu l' surface qui y avo i faijo vraimint parent pauv' face au magasin d' Noeux les Mines , et y a freumé .....
aprés si j' devo vous dresser la liste des commerces qui s' sont succédés là, mon diu que malheur ... in l' espace d' 25 ans , ché terripe, des magasins d' papier peint surtout, mais pas un seul y a tenu l' coup .............