l' plus tchiote mason des zouillères d' Bruay
par minloute le, 17/03/2011ché en triant ché photos que j a arqué d' sus, ché eune mason qui est rue Florent Evrard à Bruay
chéto l' mason del cousine à min père, l' fameusse Clara avec ses cabats qui arpinto Bruay tous les jours avec s' démarche dodelinante, équilibrée comme ché trimarans et leu flotteurs par un cabas dans chaqu' main .......
Clara qu ale avo toudis mau à ses gampes, qu ale faijo del' tension etc etc etc etc, mi j y a appris des termes, ou plutot intindu sans trop les comprinte vu que mi pindant qu ale discutto avec m' mère mi j' buvo min verre d' jus d' raisin "chaland" dins min verre à moutarte récupéré du que d' sus y avo d' dessiné Riquiqui et Roudoudou....
mais arvenons al' mason d' Clara, là ale a été racatée et rénovée complet' mint
et meme agrandie pour vous dire ...
in fait i zont arconstruit des murs autour d' l ancienne mason, inl' vo au niveau des farnietes qui sont grinmint en retrait
d'vant y avo pas 2 farnietes mais eune seule, celle d' droite, à gauche chéto l' porte que t y accedo par tro marches usées , in pierre bleue, qui permettotent d' t hisser au niveau del premiere pieche
chte premiere pieche ale éto bas d' plafond, pour mi 2m au miu 2.20 m de hauteur , chéto l' pieche du qu ale avo sin fauteule et qu ale raviso c' qui ch' passo dins la rue par l' farniete
dins chte pieche là, tavo un escayier qui fallo un chausse pieds pour arriver à l étache du qu' t avo eune pieche toute pitite , sous les combles , que chéto s' champe à coucher à Clara
in vo que l' mason ale fait comme un T, dins l' barre du T, chéto l' pieche principale à Clara, yavo sin buffet sul' droite in rintrant , tout d' suite à gauche eune tape et des caielles l' long del farniete, et au fond un fourneau , plus bas qu ale mason et un placard du qu ale metto ses courses
l' porte qu in vo et qui asteure est l' porte principale, chéto l' porte qu ale donno sur eune courette, ch' muret y éto pas abattu comme asteure
cha donno comme ichi par un tchiot escalier, l accès au gardin d' clara, et j avo ker étant tchiot , in d' mindant la permission bin sur, d ' monter jusqu à ch' gardin et ardéchinte as' mason
chéto l' seule mason que j' connaisso que ch' gardin y surplombo l' mason
bin sur avec l ache, ch' gardin ché d'venu la foret vierche , avant qu ale autorisse ch' vigin à l exploiter li meme
mais arvénons à chte pieche principale du qui avo l' cuisine, à l étache y avo rin , pasque aussi bin devant que su l arriere, l' toiture ale a été arfaite avec un brisant , ch' pan d' tuile tout drot qui fait décroch'mint
pour mi l' toiture d époque chéto eune simpe toiture à 2 pans, et qu au d' sus del cuisine in y accedo pas chéto des combes perdus
donc 3 tchtiotes pieches au total , et pi dehors dins l' courette , ché ouatères et un paquet d' barraques avec des toits in tole galva rouillé, repaire des cats du quartier
repaire des cats du quartier , quand que t allo chez elle, i n avo toudis 1 ou 2 sul' rebord del farniete, à moins qui grattent al' porte pour avoir à minger
faut dire que dins l' courette cha sinto l' bonne odeur du pipi d' cat...................
Clara ale a parti des' mason y a presque 20 ans , vu qu ale a été un bon momint aux Flandres , eune mason d' retraite d' Bruay
à la fin ale confondo tout l' monte , m' femme chéto m' file, mi j éto min frère etc etc
j' me souviens d' ch' grand couloir sompe avant d arriver as' champe, in y artrouvo queques bibelots et souv'nirs qui tronotent avant su sin buffet
al' m avo dit aussi "au matin j ouve l' télé, j' vo pu grand cosse, et j attinds l' soir pour aller m' couquer"
mais in va pas finir sur eune note pessimisse, s' mason toute tchiote qu ale éto , in y éto toudis bin archu
et j' me souviens qu un coup m' mère ale m avo dit d aller porter quequosse chez elle, j éto arvénu, avec des kilos d' pommes, d oranche, des cigarettes pour mi, et j in passe.......
j a oublié d' dire que dins l' pieche d' derriere du qui avo s' cuisine et s' tape pour minger, chéto bin moins ensoleillé qu asteure, pasque ch' muret qui y avo dehors et toutes ché barraques , cha atténuo l' leumiere exterieure
de ch' fait là yavo pratiqu'mint toudis l' leumiere d alleumée dins chte pieche
à bin raviser l' toiture, ch éto bin eune toiture à 2 pans tout simpe, et pour vous dire "la hauteur" qu avo l' mason, faut partir del' panne sabliere, ché du que l'toiture ale s arrete in bas, et vous montez in biais jusqu al' pointe del farniete del mason, et chéto cha la hauteur initiale
in arconstruisant comme cha i zont augminté l' volume del étage
( 2 photos)