inventaire à la Prévert

"Une pierre, deux maisons, trois ruines, quatre fossoyeurs
... un raton laveur

Une douzaine d' huitres, un citron, un pain, un rayon de soleil, une lame de fond,six musiciens, une porte avec son paillasson,un monsieur décoré de la légion d' honneur ...

un autre raton laveur"

Extrait du poème "Inventaire" de Jacques Prèvert

In auro pu y a queques temps l' adapter pour Bruay ...

"Eune mason d' coron, un aucuba, un chevrefeule, 2 rampes, tro farnietes .....et un faisan such rebord ..."

photo prisse par Sopraniste de Bruay à la fin du mos dernier

mais quo qui v' no faire par ichi au coeur du vieux Bruay ? mystère ........

Jacques Prévert in l avo ker in poésie , ch est comme Paul Fort et sin ptit ch'val dans le mauvais temps cha nous parlo à nous ché tchiots quand qu in devo apprinte ché récitations ...

chéto des mots tout simpes , et par la meme plus facile à retenir

souvint ch' maite i avo sorti dins la matinée eune espéce d' machine, j' cro qu in appelo cha eune policopieusse , et in pouvo et' sur que dans l aprés midi in avo dro à eune nouvelle poésie
l' rituel étot toudis l' meme , i nous faijo déchinte pour l' récréation, pi y armonto dans l' classe pour justemint faire tourner l' policopieusse

chéto eune espèce d' cylindre avec eune manivelle, in y coincho eune feule espéciale du que ch' maite i avo écrit avec s' belle écriture , un poème

aprés i tourno l' manivelle , et ché feules qui sortotent ale z arprenotent c' qui éto such' cylindre
eune espèce de scannache avant l heure, ou d mini imprimerie

ché texte i sorto in bleu , et les tites in rouche

pi ch' maite quand que la fin d' la récré ale éto sonné, ch' maite i déchindo nous récuperer

nous in savo du qu in devo s' placher, bien en rang, ch' maite i resto such' péron "bras tendu fixe , revenez, fixe"
et tout l' troupe ale s ébranlo dans l' couloir pour monter ché escaliers, in navo toudis un qui s amuso à faire un croche pied à chti qui le précédo, ch' maite i gueulo alors

quand qu in rintro dins l' pieche, yavo eune odeur à la fois agréape et désagréape, cha dépindo si cha avo été fait y a plus ou moins longtimps, mais ché polycopieusses cha marcho avec eune espece d' alcool blanc, et cha sinto

là yavo qu à raviser l' grande tape du fond, ale éto arcouverte d' feules d' papier polycopiées in train d' séquir
ouais pasque comme j' dijo, chaque feule ale éto cor un peu imbibée d' l alcool blanc qui avo servi à y imprimer ch' texte ......

et que si té laicho ché feules séquir les eunes sur les zautes , té pouvo et' sur qu in allo à la catastrophe , pasque ché feules as' collotent les zeunes aux zautes, que cha faijo des traces bleues su ché feules

l' après midi, in devo sortir nos cahiers d' poésie, note pot d' colle, savez ch' pot d' colle avec s' tchiote pelle in plastique et in devo coller bin aux quat' coins l' feule du poème sur la droite dech' cahier , distribuée entre temps par ch' maite

ch' maite i nous lijo ch' poème un coup, i poso des questions pour savoir si in avo bin compris, pi i nous dijo "notez dins vos cahiers, apprinte les trois premieres strophes pour mardi prochain" , aprés i nous laisso un momint pour qu on illustre su la gauche del feule le poème qu in veno d' lire
et ché vrai que chéto plus simpe à illustrer "le ptit ch'val dans le mauvais temps" qu in poème d' Victor Hugo ou de Théophile Gautier ...