ches piles ou l'ampe d' poche

Mi min souvenir des piles, nom qu'in donnot à l'ensempe del l'lampe ed poque, ch'est associé à l'lecture .. ou à l'apprintissache des leçons, voir des devoirs à finir

Ch'étot au lycée à Béthune, j'étos pensionnaire et el soir après l'extinction des feux "in pilot" , chétot nou expession pour dire qu'in lijot ou qu'in travaillot avec eune lampe ed poque, soit sous les couvertures mais souvint aussi vers les douches , in dijot "ah j'a pas fini d'apprinte tel truc, ben c'soir j'vas piler"

I m'arvient aute cosse , el fameusse pile (puisque ch'étot comme cha qu'in appelot el lampe de poche) ch'étot comme j'viens d'vous l'dire un ustensile indispensape dins l'trousseau des pensionnaires, mais ch'étot aussi quetcosse qui étot toudis à portée d'main dins eune mason

Mi j'habitos à la campagne à Enquin les Mines et d'ailleurs comme à gramin d'indrots in n'avot pas ed l'éclairache public toute el nuit, j'cros que ch'étot extinction des feux à 22h.
Mais à ch't'époque là in "féjot série", jé n'a déjà parlé j'cros bien sur el site mais "faire série" ch'étot aller passer el soirée amon des voisins ou amis dins l'villache, in partot après souper et in passot el soirée insanne (sans raviser el télé...)

Mais pour rintrer à s'mason, à pieds à travers el village et l'long des camps, fallot y vire un peu clair, y avot pus d'leumière dins chés rues et in plus même si i passot pas gramin ed carrettes ch'est surtout qui avot pas d'trottoirs et qui y avot core des caniveaux .. donc pour pas baller dins ch'caniveau et vire dù qu'in mettot les pieds, in n'partot jamais sins s'pile et in s'éclairot comme cha pour rintrer à s'mason
Avant d'dire au revoir à ches amis i n'avot toudis un pour deminder si in n'avot pas oublier nou pile
Ch'est des trucs qui nous paraissotent tout simples et tout bêtes à l'époque et qui paraissent appartenir aujourd'hui à un aute monde .....

mi aussi j'ai pilé. quand j'éto jone et que j'allo couquer ché m'tante. ej dormo avec min cousin l' soir in s' metto in d'sous d' ché draps et avec l' lampe d' poche in liso tintin et milou.