la lampe d' poque dins tous ses états

zetes peut et' étonnés ché jones, d' vire l' interet , que dis je l engouemint (vla que j' prinds ma langue du diminche) qu in a pu avoir in discutant d eune simpe lampe ed' poque ...

faut surtout dire que cha servo bin plus qu asteure, et ché un peu l' faute à EDF si l' lampe d' poque ale est un peu tombée en désuétute ........

j dis pas que ché gins i n'ont pas, in arviendra là d'sur aprés , mais cha sert pu grinmint

nous in a connu l époque du qu in sin servo souvint .... in étot tout autour del tape d' la salle à minger à raviser l' télé au soir ....

et là d' un coup , pu d' son , pu d imache, pu d' leumiere, pu rin ....
tout cha accompagné par différents "ha" que j' va bin sur m' faire un plaiji d' vous détailler ...

yavo le "ha" des zinfants qui s amusotent à crier dans le noir
mais yavo surtout le "ha" des infants in peu craintifs et qui cachottent l' réconfort dans les bras ou tout au moins dans la main d' manman, en l' acoutant dire que chéto pas graffe ......

yavo aussi le "ha" des zadultes , pasque bin sur cha arrivo au momint l' plus zimportant du flime du que les mexicains i zallotent attaquer Fort Alamo ...

quand que j' parlo d' eune maman qui rassuro ché zinfants, chéto pas am' mason, eum' mère ale supporto pas l' noir complet alors in avo dro à un "ah" qu in s' demindo si ale allo pas nous faire un arret cardiaque et qu in allo l artrouver raite such' carreau eune fo l' leumiere ralleumée ...

mais chéto aussi accompagné d un grand "meeeerrrrttte" et cha t avo pas à cacher , chéto min père ....

m' mère , d' eune vo chevrotante, ale dijo à min père " Léonce y a pu d' leumiere" ...

min père qui avo fait des étutes de psychologie mais qui avo du abandonner am' m' n' idée in cours d' route i li dijo in l ingueulant "j' la vu Odette"

et j' vous passe les "meerte " qu in allo intinte jusqu au momint qui allo trouver l' lampe d'poque dans le noir

"du qu ale est Odette l' lampe ?", "bin dinch' buffet" qu ale répondo, et min père "à droite ou à gauche ? "

et m' mère qu ale répondo "j'sais pu" , alors là min père i allo des' litanie "ouais ché quand meme pas compliqué d' savoir si ch est à gauche ou à droite " ...

j' in passe et des meilleures

y a des coups in avo dro à des r'tours d' leumiere, in voyo ché zampoules dins ché lustes clignoter tout douch'mint, s alleumer d un grand éclat , et s éteintent à nouveau

tout cha suivi par toute l' série de "ha" que j' vous a décris précédemmint .......

là cha voulo dire que chéto pas d'not' faute, d' ailleurs chéto l' seconte question qu ale d' mindo m' mère à min père "ya ti del leumiere dins l' rue "

ouais pasque durant que l'leumiere ale éto pas arvénue ou tout au moins l' lampe d' poque , m' mère ale resto vissée dins sin fauteule .....

si chéto pas nous , y avo pu eune fos l' lampe d' poque artrouvée, ram'ner c'que j' trouvo magique chéto les bougies

zavez vu nous les tchiots in éto pas rassurés quand qui yavo pu d leumiere, mais in allo raler aprés quand que l electricité ale allo arvenir car nous in auro voulu que ch'momint du quel' pieche ale éto alleumée avec ché bougies , i dure bin pu longtimps

d' ailleurs eune fo que l' leumiere ale arveno, in attindo un tchiot peu avant d' éteinte ché bougies pasque l' électricité ale pouvo ardevenir vacillante cor assez souvint .......

quand qu in éteigno ché bougies, j avo ker l odeur qui s in dégageo


y a des coups aussi chéto d' note faute, ou plutot in avo intindu au momint d' la coupure d' courant un grand "clac" , chéto ch' compteur qui avo sauté ou tout au moins un fusipe

ché pas c' que j avo l' plus ker cha, pasque j' connaisso l' patience d' min père, j ' la hérité d ailleurs, in a ker in bricolache commincher un traval, mais surtout que cha traine pas des heures ....

j' vous passe les détails, mi j éto pas rassuré, bin qui a des fos min père i me d'mindo d' y donner un coup d' main, quand qui devo armette un fusipe

j' vous a épargné un grand momint aussi, artrouver ché bons fusipes dins l' grand tiroir d' min père, et là si i trouvo pas tout d' suite l 'bon fusipe, in l intindo monter en pression ...
aprés j' devo l accompagner ach' compteur, un peu comme un enfant d' coeur qui accompane Monsieur l' Curé pour les derniers sacremints ....

j avo pas ker qu' min père i mette ses dogts dinch' compteur, j avo toudis peur qui so électrocuté

mi j' devo tenir l' lampe, et fallo et' raccord avec min père, bin l éclairer du qui dijo, meme si ses explications ale zétotent pas clair pour un infant d' 8 ou 10 ans

sans compter qu à cht' age là, tenir l' lampe d' poque alleumée, j avo ker faire des arabesques d' leumiere ach' mur, j avo comminché à faire cha un coup qu' min père i éto in train d' es batte avec ché fusipes

j a vite compris qui fallo que j' me concentre sul' sujet ...... aprés min père i arlevo l' manette du compteur, j avo toudis un peu peur que tout y explose, bin nan, cha ché toudis bien passé
l' preuffe ché que j' peux cor in parler 40 ans plus tard

un cop ej raviso "la guerre des mondes" avec maman. min père i travaillo du soir. ej devo avoir 7 ou 8 t'ans. pour celles et ceux qui n'ont jamais vu l' film. ché l'histoire d'eune invasion de martiens sur terre avec des soucoupes volantes.
ej jour la i faisot eune tempête j'éto pas trop rasssuraille. i arriva s' qui devot arriver i a eu eune coupure d' courant. dins m'tête ej m'imagino ché martiens intrin d'débarquer. dins l' cour, que peur ech'jour la j'ai eu vite fait d'aller m' blottir dins ses bras. et j'ai bien été contint quand l' lumière s'a rallumée et j'ai pas ravisé la fin du film. ché eune histoire date d'pus d'44 t'rans mais ej cros que jusqu'à min dernier soupir ej m'in souviendrai
ne l'dite à personne l'nuit la j'ai dormi avec min nounours.