Mémé et les hosties
par minloute le, 11/05/2011j a écris "Mémé et les hosties" et non pas "Mémé et les orties", d' ailleurs faut pas pousser Mémé, comme dit l' expression ....
cha y est minloute y a d' venu complet'mint brind'zingue (cha chéto eune expression d' em grand mère Emma)
faut dire qu am' qualifio aussi d' " innochint", d'"ablayeux" .....
mi j a toudis eu plaiji à faire rire em' grand mère, autant ale éto appelée l' "commandant" pasqu ale éto sévére et vraimint d' l' ancienne génération , autant ale avo ker ché zinfants en général
quand que j' dis cha j' pinse à min cousin et mes cousines, qui eux , l' ont eu in permanence pasque ma matante quand qu ale s a marié ale a restée al' mason d'es mère, am'mote que eux i zont un avis plus mitigé ...
entre l' vire d' temps en temps et sel ' farcir en permanence ché pas la meme chosse
ché d' ailleurs l' reflexion qu in s' fait nous aussi ché zhommes quand qu in ravisse nos garnoules ..........
mi j a des souv'nirs d' elle, d' ses gros ziu quand qui y avo quéquosse qu in dijo qui li plaijo pas, ale éto aussi capape d' pas parler pendant eune paire d' jours , mais ale savo aussi et' bon public
avec mi ale éto bon public, j adoro l' faire rigoler, ale avo alors eune figure d' poupée avec d'bonnes joues, et un rire tout rikiki
et si aujourd hui j' vous parle in patois , ché non pas pasqu ale mason in l' parlo , in parlo pas patois ché nous, ché d' abord pasque j avo appris par coeur les répliques d un disque dech' Guss ..
et j' faijo un plébaque parfait , et cha faijo rire m' grand mère à s in étouffer
l' diminche m' grand mère ale veno minger al' mason, aprés avoir ravisé le jour du seigneur bin sur ...
chéto d' ailleurs eune expédition rodée, faut dire qu' min père chéto pas n importe qui, i éto magasinier chef aux ateliers des zouillères............
donc min père li y allo al' messe à Sainte Barpe , pi aprés y a été soit à Saint Martin du temps d' l' abbé Héripret ,soit à l églisse d' Labussiere quand qui y avo l' abbé Mille
bref quand qui arvéno d' la messe, i allo ker m' grand mère à mon dem' matante et i l 'am'no al' mason, alors là yavo l' grand rituel :
eune fo qu ale éto débarassée d' sin mantiau, min père i li donno eune tchiote boite ronte que d' sur chéto doré et au miyeu yavo l' dessin d un bouquet d' roses
m' grand mère ale ouvro cha et al' sorto d' là délicat'mint l' hostie qu' min père i li avo pris
al' s artourno, (j avo été vire un coup que j éto tchiot et curieux quo qu ale faijo eune fos l' dos tourné ) et là ale avo comme les ziux qui roulottent in l' air,s' tiete dirigée vers ch' plafond, in voyo meme l' blanc d' ses ziux pour vous dire, pi ale avo l' air d' baragouiner quéquosse ..
pi aussi vite qu ale avo eu sin air bizare, comme chi ale avo mingé quéquosse d' extraordinaire , in avo l impression qu ale arvéno sur terre, et là ale nous dijo bonjour et allo s assire sus' cayelle, près du radiateur
ale avo toudis frod m' grand mère ....
( 1 photos)