in classe, direction Bruay
par minloute le, 12/05/2011j' a c' souv'nir là, j éto en CM2, pour ceux qui ont pas connu cha , chéto Cours Moyen deuxième année, l' derniere année avant d' quitter l' école Loubet et d' rintrer en 6 ème
cha nous arrivo plusieurs coups dans l' année d' quitter l école en rangs et d' déchinte vers Bruay
pour mi chéto un bon souv'nir sauf quand qu in déchindo l' année avant pour aller al' piscine, toudis avec l école.....
j avo eune peur bleue d' plonger dins l io, j' voyo ch' carrelache au fond que cha m attiro
mes parints i m ont fait printe des leçons d' natation avec ch' mait' nageur
ché pas l' directeur d' Loubet d' l école , avec ses méthotes radicales, comme pousser ché zinfants dans l io quand qui voulotent pas y sauter d' eux memes , qui m avotent artirées m' peur bleusse du grand bassin ......
j' citerai pas sin nom, j y envo dans l' au delà min plus grand mépris
mais yavo d' autes momints que j avo ker y aller en ville :
ché quand qui yavo des expositions à la salle des fetes, ou pour y passer ch' junicode , ch' fameux permis d' conduire pour infants que j a jamais réussi à avoir, ou aller au colisée pour vire un conférencier
pasqui s app'lo Mahuzier, et qui faijo partie d eune grante famile d' explorateurs , que les plus anciens ont connu, la famille d' Albert Mahuzier mais cha aussi ché cor un aut' sujet ....
quand qu in déchindo pour ché éven'mints là , in éto contints, cha nous cangeo del routine d' rester à l école
pi in avo ker comme cha sortir dins les rues durant qu in éto normal'mint à l école
chéto un peu comme eune récréation supplémentaire .....
cha arrivo à min camarate Philippe , d' vire sin père travailler dins sin gardin, et i l appelo discret'mint in passant
i éto fier si sin père i l avo vu et qui li faijo un coucou des' main ..
mi j in éto presque jaloux d' pas habiter dins ch' te rue , jamais in passo in groupe d' vant ché mi ......cor eune injustice ...
cha nous arrivo aussi à certains d' croiser eune matante , un mononque dins l' rue ou qu in s' moquo d' quéqu un qu in avo rincontré at qui avo l air un tchiot peu "béguénoule"
mais croyez pas qu in déchindo en ville comme des ébeulés, comme eune bande d' routiers du temps de duguesclin ...
nan ,nan, fallo bien rester en rang, acouter ché maites,faire silence, et bin raviser d' vant soi
pour ché CE1 ET CE2, Cours Elémentaire Premiere et deuxieme année, i devotent in plus s' donner la main ....
s'donner la main ..... nous , qui étotent ché "grands des grands" , in les raviso , ou plutot in les toiso dédaigneus'mint .....
(in savo pas cor que l année prochaine quand qu in s' ro en sixieme, cha s'ro nous qui allotent et' ché plus pitits)
Croyez pas qui suffiso d un simple rassemblemint pour que l' groupe i s ébranle et qui quitte l' cour pour s engager rue de Denain....
avant d' sortir d'la cour d' récré, ché maites i nous rassemblotent et in devo s' mette en rang, acouter les dernieres consignes qui fallo respecter durant tout ch' trajet
in éto en rang, classe par classe, not' maite sul' coté prèt à sévir
in auro dit un peu l' organisation des troupeaux d' vaques dins ché flims d' coboyes , devant y avo un maite qui ouvro la route, su les cotés ché zautes maites répartis l' long du "convoi"
et à la fin du troupeau qu in formo yavo un maite pour freumer la marche ...
sans compter such' tchien du berger qui allo le long du troupeau près à morde ché mollets d' ceux qui trainotent .....
cha chéto not' directeur adoré, qui prenno un réel plaiji à surprinte untel ou untel à discuter entre les rangs
cha li permetto d' li foute eune bonne tape derriere l' tiete, ou miu d'li torde un bon coup eune orele ..........