ché dattes et ché figues

cha "traino" au miyeu des zétalaches des marchands d' fruits et légueumes, j' me souviens qui in avo à mon d'chez Monsieur Leroy qui teno sin commerce rue Anatole France, ché plus anciens i l'ont connu quand qui éto cor rue Florent Evrard .....

m' mère ale acato cha d' temps en temps, chéto présenté del meme maniere, eune espéce d' carton aux bords un tchiot peu arlévés et arcouvert d un plastique

mi,l' menton collé au niveau del' tape, j' raviso ché dessins qui yavo su les cotés du carton d' emballache

et là j' voyageo ...... chéto un carton à fond jaune pour ché deux produits, am'mote que cha veno du meme coin .....

et d' sus y avo un dromadaire d arprésenté, pi 2 3 palmiers pour arprésenter l' desert .............

pi yavo dins zin coin un croissant d' dessiné , et à l aute bout ,eune main d'Fatima ...........

d' l' aute coté del boite , cha permetto aussi d' voyager , non par les dessins mais par l écriture ...

en effet, chéto écrit en grante partie en arape, et in plus pitit in français

y a des coups j essayo d' arproduire ché lettres , chéto meme plus du dessin pour mi que d' l écriture ........

quand au contenu ....... allez in va commincher par ché figues ....

quand té voyo l' paquet, et ché figues d' dins comme écrasées , té teut' demindo si la tante Georgette ale avo pas assis sin gros tarlare d' such' paquet , qu ale s éto arlévée, et qu ale avo rin dit ...........................

(faut dire qu' la Tante Georgette ale auro pu et' eune vénusse callipyge, plus callipyge que vénusse d 'ailleurs ).......

quand que té voulo in minger eune d' figue, chéto tout assemblé, imbriquées insempes, fallo tirer d' sur pour l' détacher des zautes ......

pi que aspect, l'pio del figue, ale éto toute fripée, in auro dit l' pio del main d' em' grand mère ........

zallez dire avec des comparaisons comme cha, l' tarlare d'el Tante Georgette (paix à s' n ame) et l' pio d' em grand mère (j't' embrasse Mémé) , cha devro pas et' bon eune figue séque ........

bin nan , bin si, mais fallo passer l' premiere impression, pasque eune fo qu in l avo in bouque .....

d' abord t avo l impression d' croquer dins zin pneu ....... mais aprés quo qu' chéto bon ..............

chéto vraimint gouteux , té sinto bin ché pépins , mais ché surprenant qu'un fruit d'un aspect vilain , i so si bon à minger ...

par conte ché figues , meme si t avo ker cha, t in mingeo pas des tonnes, t avo vite l' sentimint d' trop plein..............

pour min compte me parlez pas des dattes ....... bien rangées sur 2 niveaux cor accrochées à leu tige dans l' meme type d' boite, bin j' avo pas ker cha du tout ........

in plus quand t in prenno eune , chéto bizare au contaque, comme si chéto un peu gluant, et comme mi, quand j éto tchiot, cha m arrivo d' minger et d' mette en meme temps m' main dins les caveux ....

zimaginez d ichi les cris d'eme mère ...........

sans parler qui fallo cor artirer ch' noyau au miyeu , ah nan

les dattes nan, les figues ouais ..........

quo que ....... ché figues comme ché dattes, ale zont un point commun, ché des produits efficaces ...... si y a longtimps que t as pas été à ché ouatères, cha a un effet "salvateur" pour certains, in tout cas ché du "destope naturel"