dins m' sac d' récré
par minloute le, 17/05/2011Ecole Loubet , lors d' la récré avant l étute ........
eh , quo qui y a d'dins ?
attinds j' ravisse ....( in dijo cha comme si in éto pas au courant de s'qui avo d'dins...)
faut dire qui pouvo y avoir quand meme des surprisses, chéto l' grante époque du develop'mint du papier alu, alors impossipe d' vire à quoi ché tartines al' zétotent ...
nous in éto "tartine", chta dire que m' mère ale avo découpé 2 tranches dans un grand pain (pour vous dire , chaque tranche ale éto l' doupe d épaisseur d eune tranche d' pain coupé)
et j avo donc 2 "tartines" dins min sac d' récré , chéto comme eune besace, eune poche diront certains, que m'mère ale avo confectionné dins zin bout d' tissus qui devo li rester d' un rideau
ale avo arpliée l' bout d' tissu , arcousus insempe ché coté, pi opération bin pu délicate et fastidieuse , mette eune fichelle in coton in haut , et tout arcoude, pour que l' fichelle eune fo serrée , ale assure la fermeture du sac, mais que si in desserro l' fichelle, in ouvro l' fameux sac
j in a intindu des "casse me pas l' corte" , "ché pas eune fronte " , "ché pas eune brouette" (cha chéto l expression d' min père cha)
et mi à chaque coup j' dijo "ouais manman" ,mais j' su pas sur que j obéisso à chaque coup aussi ................
après j in éto réduit si l' fichelle a été cassée, d' trouver eune escusse plausipe pour em' mère, pas facile à trouver pasque mi j' avo pas d'don d' couturiere, et li dire que l' fil i s éto cassé tout seu, j' pouvo m' lever tot avant qu ale cro à cha
donc 2 tartines dins l' besace ....
alors ché à quoi ? qui dijo min vigin, (li i éto "baguette" )
attinds j' ravisse, alors pour faire s' n interessant, t ouvro ch' papier alu, pi té soulevo cor plus délicat'mint l' dessus del tartine pour vire quo qui avo d' sous.......
bin sur , cha allo jamais ...."j y avo dit que j avo pas ker l' confiture d' fraisse ......" ou " oh du brin ale a KOR oublié ch' bure d' dins " ................
mais in auro pas donné s' tartine à un aute .... in l' mingeo d' bon coeur ...
ché vrai aussi qu in raviso , qu in d'mindo à sin camarate quo qui avo dins sin sandviche ...........
d'ailleurs in avo tous à peu près la meme chosse à minger : chocolat, pate de fruits, fromache, saucisson, pi après quand chéto la saison eune oranche ou eune pomme, in tout cas des fruits qui pouvotent rester intiers avant qu in les minche, vu qu in éto parait il des "brizaques"
pour mi l' odeur d' l'oranche ale est directemint liée ach' t odeur qu in sinto quand qu in devo s' met' en rang,avant qu in rinte in classe pour l étute ....
mi de ch' t époque là , j in a gardé eune aversion et eune inclination ........
de ch' tépoque là JE PEUX PU MINGER D'PATES D'FRUITS ..... alors là , l' tranche d' pain avec del pate d' fruits, j in avo horreur
là par conte j éto prèt à l échanger conte aute cosse , l' pate d' fruit verte, celle lale cha s' mingeo cor , mais alors les jaunes ou les zoranches .....
j'm in auro fait dégueuler, pourtant m' mère am' dijo "minche ché bon , ché plein d' chuque, ché bon pour ti"
rin à faire IMPOSSIPE d avoir ker cha ......
ale s a résigné à pu m' in donner l' jur que j y a révélé que j'les donno à un aute conte un chinegome
par conte , j avo ker, meme si chéto délicat à minger l été pasque cha commincho à fonte, chéto les tartines que d'dins yavo du bure et un morciau d' tablette d' chocolat....
asteure i zont inventé plein d' biscuits ou d' friandisses du qui a du chocolat
mais cha n a rin à vire , ché del pichate d' baudet cha, nan, rin vaut l' naturel ,un bon morciau d' chocolat qu'té croque d' dins ch' pain .......
j' do vous avouer, mais rigolez pas, j a ker m' faire un sandviche avec du bure d' dins et un morciau d' tablette d' chocolat ..
j' va m assire sur min banc , un peu comme à l école, j 'su tout seu, personne à coté d' mi, mais j arsint comme un coup d' coude, pi eune tchiote vo qui m' dit " eh, quo qui y a d'dins ?"............................
ché bieau , cha m'fout la larme à l'oeil à mi...
par loumarcel le, 17/05/2011L'sac in toile fait avec eun' fichelle au d'zeur pour serrer et fermer , in ap'lot cha eun' "malette".
Mi aussi ch'étot deux tartines ed pain ed tros liff' avec du chocolat au milieu ou seul'mint du beurre et d'timps in timps avec eun'demi ou eun' pomme intière.
Que régale à chinque heure avant l'étute.
j'cos qu'ech'l'ai d'ja dit, mais tant pi , cha m'arrivot ed' tins in tins ed' minger min briquet', nan min gouter avant d'arriver a l'école, et tout cha passe qu'a midi , j'avos plucqué al tape
pi a 4h1/2 al récré avant l'étute ech'languichot d'su z'autes, et j'su sur ecqu'même jean marie y m'arot pas donné un morcieau, binde ed' galaf
quand a chés oranches ou autes fruits y fallot attinte noël pour n'd'avoir in à l'école avec el brioche , cha chétot un vrai noël pour nous
j a oublié d'dire que m' malette, ale éto faite en coton, et chéto un motif vichy rouche et blanc
par nounours-94 le, 17/05/2011nous in ap'lo cha eune malette, avec l' bout'lot in plastique avec d'el limonate.
par babette 85 le, 17/05/2011bonjour tertous
Bin mi aussi, cha m'rappelle d'bons souvenirs, les gouters din m'malette, a l'récré avant l'étude, mi, chétot comme minloute, entre 2 tranches ed tartines, eune banane écrasée avec du banania, ou bin l'été, hum....j'me régalos avec du beurre, des fraisses d'ech'gardin , saupoudré d'chuque ! un régal !
Mais quand in n'avos pas d'ecole, ce qu'in s'fesot a l'mason, in mettos des carrés ed'chocolat sur du papier alu à faire fondre su l'plaque d'ech fus, et cha...sur des belles tartines ! avec un bon bol ed'chocolat qu'em mére fesot d'elle meme: lait bouilli avec des carreaux de chocolats, ah cha...chétot pas du lait avec del'poute ed'cacao! un vrai chocolat maison
Bon..j'arrete, cha m'fait invie tous ché bons souvenirs !