la boite de cassoulet suite
par minloute le, 26/05/2011cha y est , au pris d un effort surhumain, min père i artrouvo un visache ...humain ...
ch' dernier noeud i v'no d' rinte l ' ame, i v' no d' capituler, et commint vous dire, l émotion ale éto intense, comme ont pu l' viffe queques décènnies plus tard, ché zalmands d' l'est quand que ch' mur d' Berlin y a enfin été abattu .....
là min père i calo bin ché battants d' portals, si y artrouvo ché galets qui avo laissé l année précédente, ou alors si i les trouvo pas , m' mère et mi in éto réquisitionnés pour tenir chaque battant du portal afin qui rinte l' carette dinch' terrain
chéto pour nous eune opération délicate, d abord fallo pas laisser trainer ché pieds vu que l' carette qui franchisso l' portail, chéto eune 403 break carquée à la gueule, et qu' min père tel' mint concentré qui éto pour que l' carette al' cale pas, et qui accroche pas l' bas del carette vu qui avo del pente qui s' creuso chaque année pasque ch' sape i s éto fait la malle durant l hiver ...
in plus tout in t'nant l' battant du portal l' plus possipe vers l intérieur, tout in faijant attintion d' pas laisser trainer ses ortiaux sous ché pneus del carette, fallo , in plus guider min père
alors là chéto térripe, si tel guido in faijant des gestes pas assez précis pour li, ou si té faijo cha sans montrer que t éto plus que concentré, OU PIRE , si l' battant i arvéno et que cha frotto sul' l' carette .............
meme mi ,j' avo compris qui fallo surtout pas rigoler ou faire eune reflexion si min père i calo l' carette quand qui franchisso l'portail, là t avo dro à un "meeeeeeeeeeeeerrrrte" monumental, pi aprés ché retombées, pasque si yavo calé, chéto la faute soit à ti , soit at'mère , qui l avo mal guidé, et que cha l avo fait caler ......
ouf cha y est, l' carette ale est rintrée dins l' terrain, ch' portal i est arfermé
j a dit arfermé, pas "arclaqué" , mon diu , fallo pas claquer ch' portal sinon t avo dro à "ché pas eune brouette" ou "assassin"
si si, "assassin" , vu l' nompe d' fo qui m a dit cha, j' devro et' devenu un sériale quileure ................
l' portal y éto arfermé, in libéro ch' tien qui avo fait l' voyache au pied dem' mère
min père d un seul coup , s' tension ale ardéchindo, et i essayo d' faire d'l' ironie avec m'mère et i comprenno pas qu ale rigolo pas , comme si is' souv'no pas que deux mineutes avant i l ingueulo in dijant qu ale guido mal ......
alors i raviso s' pelouse, i raviso vite fait du qui allo arpiquer , arplanter ché pousses qui étotent dins ch' coffe , mais m'mère ale le rappelo à l orde vu qu ale avo invie d aller faire pipi ...
fallo alors ouvrer l' porte du chalet, là souvint en début d' saison, comme l' porte ale avo juée avec l humidité, fallo souvint donner un bon coup d épaule pour l ouvrer
j' me souviens un coup j' avo dit d ailleurs à min père "assassin, ché pas eune brouette" quand que jel voyo appuyer d' toutes ses forches pour ouvrer l' porte
ché bizarre, mais là y a pas eu d humour, pas facile à comprinte ché grantes personnes
cha y est l' porte al' s' ouve,in intind ché grains d' sape qui crissent durant l' ouverture du battant
d'dins y a comme eune odeur d' renfermé, ché volets sont cor tirés, m' mère ale rinte dins l' mason comme si ale faijo partie d eune troupe d' pénitents ......
mi j attinds qu eune chosse , qu in ouve l' porte d' derriere pour aller juer , mais avant va falloir donner un coup d' main à rintrer ché zaffaires dins l' mason, pi ensuite à coté del barraque à min père