l' boite d' cassoulet ENFIN
par minloute le, 26/05/2011In traino pas nan pu such' promontoire, rapid'mint in arparto en sens inverse, toudis par l' avenue de la plage, pasque si té prenno ché zautes rues, t éto sur d' pas vire grand monte, et chéto meme plutot l 'promenate d' l aprés midi , à trois , avec mère .......
là in arpasso par ch' boulanger qui faijo l' coin face à l église, chéto tenu par Mr et Madame Carré , pi in arveno al' mason
les 100 derniers metes , eune fos l' derniere rue traversée, j'avo ker courir, aller en avant, pour prév'nir m' mère qu in arrivo ...
bin sur in arrivo au portal, j' ouvro meme pas l' barriere, mi , sur min cheval indien, j' sauto ch' t obscaque là dédaigneus'mint ...
j' ouvro l' porte, quequ' fo m' mère ale m aido pasque ché pas que de l huile qui auro fallu al' porte, ché un coup d' rabot in d'sous ...
m' mère ale éto souvint in train d' finir d' couper l' salate qu ale avo préparée à l avinche à Bruay , et qu ale avo misse dans un sac plastique
l' tape ale éto mise, min père i rintro à son tour, et i sorto s' phrasse habituelle " in a été vire, la mer ale est là ch' t année"
j allo m' laver les mains, ou plutot chéto sous la surveillance rapprochée dem' mère
in s asseyo à tape, et j avo ker ch' momint là, pasque ché couverts comme ché fourchettes chéto souvint déparaillés ...
des coutiaux qui coupotent moyen'mint, (dont certains de la marque "le tonkinois", du qu in voyo un anamite (ché pas eune sorte d' champignon) d' profil , avec des moustaches fines qui déchindotent d' chaque coté d' sin visache , coiffé d un capio pointu ....
des fourchettes in fer blanc, qui fallo pas trop appuyer d' sur sinan cha s' plio facil'mint ...
pi d' zassiettes qui avotent déjà bin servis, in avo dro aussi à "té vo Léonce, ché l' service d' not' mariache"
j' connaisso la suite par coeur ......."enfin c' qui en reste , qu est ce que j a pu casser quand qu in éto ensempe au début" ......
pi cha continuo sur eune tchiote pique " chéto du temps du qu in habito ché t' mère" .............
j' avo compris à l époque , mais j a cor miu compris par la suite ,que cha avo pas été facile pour m' mère au début qu ale éto avec min père, vu qu ale a été habiter chez s' belle mère, qui elle avo eune adoration pour sin fils unique ..........
j avo ker aussi ché verres, à croire que tous ché verres d' moutarte décorés i zavotent fini ici leu carriere ......
mais sul' tape y avo aussi 3 tchiots verres, et min père i nous servo un verre d' cabernet d anjou
quand que j y pinse avec du recul, mais dés l age de 8 ans j' buvo del biere à ché repas, meme si chéto del biere d' tape que chéto mes parints qui fabriquotent cha
mais aussi, et dès l age d' 12 ans , j avo dro à min verre d' rosé au début du repas, min père m ayant dit un jur, "t as 12 ans , comme mi à tin ache, t aura dro à tin verre d' rosé en entrée "
cha parait hors du temps asteure d' donner un verre d' vin à 12 ans à in éfant, vous m' direz aprés i s'rattrape su ché canettes .....
en entrée in avo dro souvint à des carottes rapées accompagnées d' rondelles d' saucisson
ou alors chéto salate d' tomates et que d'sur y avo des zeufs cuits mais in miette, avec bin sur ciboulette et échalotte, que j in pluquo un morciau avant d' passer à tape
et aprés chéto ch' fameux cassoulet, em' mère ale dijo toudis in allant querre l' castrole, "j a pas fait d extra aujourd hui, in vient juste d arriver" .....
comme si ale éto fautive d' pas faire un "vrai" repas, mais pour mi j éto aux zanges
alors que marque, chéto soit du william saurin, soit la conserverie des flandres, un nom comme cha, d'sur in voyo un viu couple d' paysans
chéto moins cher que l' william saurin mais tout aussi bon, et comme j éto sache, j avo dro à un morciau d' lard in plus ...
j' savo qui fallo faire attintion à chaque coup avec l' castrole in fer blanc, vu que ch' manche in bo, à forche d' cauffer, i s éto retréci et i tourno sur li meme, et quand que té prenno l' castrole par l' queue, fallo t'nir à la fois l' manche in bos, mais aussi l' pieche métallique qui avo juste d' d'vant
mais que j avo ker l' minger à Merlimont autour del tchiote tape, m' mère ale arsoto ché vieles louches pi ché couverts à salate
"du qui est ch' l ouve boite " fallo raviser du qui éto ch' tiroir qui éto such' coté del tape, sous l' toile cirée "ché d' tin coté Odette" , " ah y est là" ,ale dijo cha tout in ayonnant ché zustensiles qui étotent dins l' tiroir bric à brac
à croire aussi que chéto meilleu qu à Bruay, faut dire qu ichi cha avo djà un air d' vagances, pi faut pas oublier " yavo l iote" et j avo l' fu aux joues ....
rin quel fait d aller à la plage, d arvenir, d' sintir ché zembruns, cha m avo ouvert l appétit, et savez , comme dit l' proverpe, "vaut miu l' vire in photo qu à tape" ......
asteure tout cha ché bien loin, ché un temps révolu comme on dit, mais cha m impeche pas, quand que dès fos j' su tout seu al' mason, d' avoir prévu l' coup ,et d' mette in route ch' jur là such' fu , l' fameusse boite d' cassoulet ...
alors zallez m escuser , mais aujourd hui j' su tout seu al' mason, et comme midi i s' rapproche, savez déjà mes gins c' que j' va minger ................
Marcel Proust i pinso à ses madeleines, et mi, à min cassoulet ....