l' diminche à la mer ché pas fini
par minloute le, 27/05/2011comme in éto rintré cor assez tot al' mason, vers 18h00, l' temps que m'mère ale fasse à minger, qu' min père i arlisse s' voix du nord, pi qui alleume ch' transistor pour intinte ché zinformations sur europe numéro un, in passo à tape ...
dehors par l' farniete, in voyo arpartir un flux inéterrompu d' carettes in direction des terres
meme que, cha arrivo à chaque coup que ché carettes ale zétotent bloquées juste al' sortie du centre d' merlimont, au niveau du garage shell, du qu après i zont construit à coté un mini golf et un restaurant ...
pour que cha bloque d ichi aux feux d' merlimont villache, yavo facil'mint plus d' tro kilometes au total, pour vous dire l' nompe d' carettes qui yavo in plus l' diminche dans merlimont qu un aut' jur d' la s'maine ....
vers 19h30, j' arparto jusqu au front d' mer avec min père, in laisso m' mère faire s' vaisselle tranquile, zavez vu commint qu on éto galants quand meme ...
in arparto vers la plage, et in croiso ché derniers retardataires qui en armontotent à pied, souvint chéto des jeunes d eune vingtaine d années, dont ché parints i louottent au campine qui yavo bin aprés l' grotte, su la gauche quand t arparto vers merlimont villache
yavo cor du monte dins la station, des zirréductipes qui voulotent in profiter vraimint jusqu au bout del journée, quitte à rintrer in carette à la nuit tombée, vous m' direz chéto pas forchémint eune mauvaise idée, vu que ché bouchons i s' rotent in grante partie résorbés quand qui s' mettrotent in route .... cha pouvo aussi et' des gins qui s' payotent un repas au snack , un traditionnel moules frites pression , tout cha mingé sur eune tape carrée que l' nappe ale éto in papier blanc .............
yavo cor du monte dins ché rues, ch' manéche i tourno cor à toute blinte sul' plache in face d' l églisse, ch' cinéma qui éto au bout del plache, cha faijo djà eune paire d années qui éto freumé aussi
devant l' sphinx, ch' bistrot pour les jones, ché tapes qui étotent su l estrate in bo ale zétotent pleines, in intindo in plus l' bruit d' tous ché flippers qui s' mélingeotent
al' boulangerie Carré qui faijo l' coin, chéto pas cor l heure d' freumer, située d'vant ch' manéche , yavo dehors eune file qu ale vindo des glaches à l italienne .....
à part l' boulangerie et ché bistrots cafés snacks du que tout y éto cor bondé, l' reste des commerces éto in train d' rintrer les derniers étalaches qui yavo su l extérieur, décrochés ché derniers ballons, ché derniers moulins, et ché derniers présentoirs d' cartes postales ...
cha y est chéto freumé au dé d argent, ch' magasin d' souvenirs qui éto caractérisé par un gros dé accroché au d' sur d' l intrée, avant cha avo été eune mercerie, mais asteure chéto les souvenirs, les bibelots qui faijotent l essentiel du chiffe d affaires ...
eune fo ché trottoirs dégagés d' ché zétalaches à roulettes, in pouvo raviser dins l' détal ché devantures d' magasins, difficil'mint accessipes l aprés midi , à cause des fameux étalaches à roulettes , pi aussi au monte qui yavo su ché trottoirs
là, l' tenue ale éto décontractée, toudis en sandalettes, short, un t shirt mais avec un pull d' sus "vu qui pourro y avoir du vint à la mer" ..
in passo d'vant ch' marchand d' journeaux , là parel in pouvo bin lire ché grands panneaux laissés dehors du qu in raconto les derniers déboires de johnny (si si déjà à l époque ) , la maladie de claude françois ou la fiancée de francois valéry .....chéto la une de ici paris ou de france dimanche ...
mi c' que j avo ker aussi , chéto d' vire chez les gins, zallez dire ché un peu voyeur , mais que que voulez, quand zavez l' pieche principale que chéto l' pieche qui donno sul' rue, mi j' jetto toudis un eule à l intérieur ...