à l autre bout du monde suite
par minloute le, 30/05/2011mi ya quequosse que j avo ker aussi, chéto l' calendrier des peuteuteu
chaque année, j éto au pied del caielle, quand que m'mère al' cangeo ch' calendrier
in cangeo de calendrier avec des tchiots cats, pour un aut' calendrier avec d' autes tchiots cats .........
j avo ker y raviser l' plan du départemint qui yavo au miyeu , pi aussi les plans d' "grantes villes" de not' bio pas de calais ..
à savoir Arras, Lens, Boulogne, Calais, Béthune et bin sur Bruay .......
ché avec ch' plan là que j' raviso du qu in habito, les différents quartiers d' Bruay ......
comme j' vous dijo dans l artique précédent, quand qu in éto tchiot in sorto pas d' sin quartier quand qu in éto tchiot , ou tout au moins pas sans t'nir l' main des' manman ....
et in déchindo ptete eune fo par semaine en centre ville, alors in avo cor moins d' raison d aller au 3 ou au 4 voir au 6 si in y avo pas d' famile proche .....
l' quartier du 3 , bien lointain pour mi, in aperchevo ch' terril tout au loin , du sentier des tombelles ou d' la rue des frères Caudron
avec ch' plan, j' raviso l' nom des rues des zautes quartiers , pour mi presque aux zantipotes d' not' quartier .........
faut dire aussi que chéto des rues avec des noms tout aussi "exotiques" , autant au 3 in éto plutot en afrique du nord (Bone, Oran, Alger, Miliana, Ab del Kadher etc ....) ....
autant vers la gare, in parto en afrique noire ....(rue de Dakar, rue du cap vert, rue du Sénégal), sacrées longueurs d' coron aussi, des rues qui simblotent jamais s arreter, meme si aprés ale cangeotent d' nom ...
la rue de Dakar deveno rue de Gambie.....la rue du cap vert deveno rue de Mauritanie ...
de l aut' coté del rue Jules Guesde, in parto aux zamériques .......
rue des états unis, rue de colombie, de patagonie, du brésil , de panama etc etc
plus loin chéto la cité des aviateurs, ché comme cha que j a appris qui éto Fonck, qui éto latham ou santos dumont ...
pasque ,et j do cha à min père, quand que j' raviso ché noms des rues, et que j' cito ché noms tout haut, min père qui éto in train d' lire sin journal "la croix du nord" , journal chrétien, i m écouto énumerer ché noms ...
et là j avo dro à " qui ché Fonck ?" , "du que ch' est le cap vert ?" j' me souviens que j avo dis que chéto à coté d' calais, bin ouais, in avo bin l' cap blanc nez, in auro pu avoir le cap vert ....
alors im' dijo, "va querre ch' dictionnaire", alors j' devo cacher pi fallo que j' trouffe vite cor, et là i acouto l' définition que j y dijo ...
chéto pas un mauvais système pour aprinte sans sins rinde vraimint compte ....